گرووپێکی چەکداریی عێراق داوا دەکات سوپا و حەشدی شەعبی بخرێنە حاڵەتی ئامادەباشییەوە

ئاڤا نیوز

بۆ پاڵپشتی ئێران، بزووتنەوەی نوجەبا داوا لە حکومەتی عێراق دەکات، سوپا و حەشدی شەعبی بخاتە حاڵەتی  ئامادەباشییەوە و ناوچەی دژە فڕین لە ئاسمانی عێراق ڕابگەیەنێت.

 

چیرۆکی سەرەکی:  جەنگی نێوان ئیسرائیل و ئێران، پێی نایە ڕۆژی هەشتەمەوە، ئیسرائیل هێرشەکانی بۆ سەر ناوەندە ستراتیژیی و ئەتۆمییەکانی ئێران، لەبەرامبەردا ئێران سەنتەری تەلئەبیب و شاری حەیفا دەکاتە ئامانج و مووشەکی نوێ و پێشکەوتوو بەکاردەهێنێت، بۆ ئەم مەبەستەش هەردوو بەرەی جەنگ ئاسمانی عێراق بەکاردەهێنن.

 

لێدوانی فەرمی: عەلی ئەسەدی، سەرۆکی ئەنجوومەنی سیاسی بزووتنەوەی نوجەبا ڕایگەیاند:  دەبێت حکومەت ئاسمانی عێراق بەرامبەر فڕۆکە و مووشەکی ئەمریکی و ئیسرائیلی بەتەواوی دابخات و بە ناوچەی دژە فڕین بیناسێنێت. 

 

زانیاریی زیاتر: ئەسەدی داوا لە حکومەتی عێراق دەکات هەموو ئامادەکارییەکی بۆ بەر پەرچدانەوەی فڕۆکەی جەنگی و مووشەکی ئیسرائیل بکات،  هاوکات سوپا و حەشدی شەعبی بخاتە حاڵەتی ئامادەباشییەوە.

 

ئەوەی پێویستە بیزانیت: بزووتنەوەى نوجەبا لە ساڵى 2013ـەوە دامەزراوە و یەکێکە لە گرووپە چەکدارەکانی بەرەی " مقاوەمەی ئیسلامی عێراق" کە لەلایەن ئێرانەوە ئاراستە دەکرێن .