ئەمریكا: پێویستە تەواوی خەڵكی هەرێمی كوردستان بەشدار بن لە دیاریكردنی داهاتوویان

ئاڤا نیوز

باڵيۆزی ئەمریکا لە عێراق، سەردانی سەرۆک بارزانی کرد و گفتوگۆیان لەبارەی هەڵبژاردنەکانی پەرلەمانی کوردستان کرد. ئەلینا رۆمانۆوسکی ڕایگەیاند " پێویستە تەواوی خەڵکی هەرێمی کوردستان بەشدار بن لە دیاریکردنی داهاتوویان".

وێنە گەورەکە: دوای ئەوەی 18 ی ئاداری ئەمساڵ، پارتی دیموکرات بەیاننامەیەکی بڵاوکردەوە و  ناڕەزایی خۆی دەربڕی لە شێوازی هەڵبژاردنەکانی پەڕلەمانی کوردستان، شاندێکی ئەمریکا بەسەرۆکایەتی باڵوێزی ئەمریکا لە عێراق سەردانی سەرۆک بارزانییان کرد و باسیان لە پرسی هەڵبژاردنەکان کرد.

لێدوانی فەرمی: ئەلینا ڕۆمانۆوسکی، باڵیۆزی ئەمریکا لە عێراق لە تویتێکدا ڕایگەیاند: چاوم بە مەسعود بارزانی، سەرۆکی پارتی دیموکراتی کوردستان کەوت و پشتگیری خۆمان بۆ هەرێمی کوردستان دووپاتکردەوە، بۆ ئەنجامدانی هەڵبژاردنێکی ئازاد، هاوسەنگ، شەفاف و متمانەپێکراو. پێویستە تەواوی خەڵکی هەرێمی کوردستان بەشداربن لە دیاریکردنی داهاتوویاندا.

لەلایەکی دیکەوە: پێشتر بارەگای بارزانی بڵاویکردەوە: سەرۆک بارزانی لە کۆبوونەوەکەدا ڕایگەیاندووە: پارتی بایکۆتی هەڵبژاردنی نەکردووە بەڵکو لەگەڵ هەڵبژاردنێکی پاک و بێگەرد و شەفاف و جێگەی دڵنیایی و دوور لە دەستوەردانی دەرەکی و بەرنامەی پێشوەختەیە کە تێیدا دەنگدەران لە مافی دەنگدان بێبەش نەکرێن و پڕۆسەی دیموکراسی بێ بەها نەکرێت و یاساکانی هەرێم پێشێل نەکرێن.