وەزیری دەرەوەی ئێران سەردانی ڕووسیا دەکات

ئاڤا نیوز

دوای کۆبوونەوەی لەگەڵ وەزیرانی دەرەوەی ئەڵمانیا، بەریتانیا و فەرەنسا، بڕیارە عەباس عێراقچی، وەزیری دەرەوەی ئێران سەردانی ڕووسیا بکات.

وێنە گەورەکە: جەنگی نێوان ئیسرائیل و ئێران بەردەوامە و هەوڵەکانیش بۆ ڕاگرتنی جەنگەکە بەردەوامە، ئەوروپا و ئەمریکا داوا لە ئێران دەکەن بگەڕێتەوە سەر مێزی گفتوگۆ و دەست لە پیتاندنی یۆرانیۆم هەڵبگرێت.

بڵاوکراوەی فەرمی: پێگەی ئەکسیۆسی ئەمریکی بڵاویکردووەتەوە، چاوەڕوان دەکرێت ڕۆژی دووشەممە 23ـی مانگ، عەباس عێراقچی وەزیری دەرەوەی ئێران سەردانی مۆسکۆی پایتەختی ڕووسیا بکات و لەگەڵ ڤلادیمێر پووتین، سەرۆکی ڕووسیا کۆببێتەوە و گفتوگۆ لەسەر جەنگی نێوان ئیسرائیل و ئێران بکەن.

زانیاریی زیاتر: ئێوارەی دوێنێ وەزیری دەرەوەی ئێران لەگەڵ بەرپرسانی یەکێتی ئەوروپا و وەزیرانی دەرەوەی بەشێک لە وڵاتانی ئەوروپا کۆبوویەوە و باسیان لە ئەگەرەکانی ڕاگرتنی جەنگ و دانوستان کرد.

لە کۆبوونەوەکەدا عەباس عێراقچی بە وەزیرانی دەرەوەی ئەوروپای وتووە، ئێران ئامادەیە سنوورێک بۆ پیتاندنی یۆرانیۆم هاوشێوەی ڕێککەوتنی ئەتۆمی ساڵی 2015 قەبووڵ بکات.