درۆنێكی ئێران لە مەخموور دەكەوێتە خوارەوە

ئاڤا نیوز

ئەمڕۆ لە بناری چیای قەرەچووغ لە دەڤەری مەخموور، درۆنێك كەوتە خوارەوە بێ ئەوەی هیچ زیانێكی گیانی و ماددی هەبێت.

 

زانیاریی پەیامنێر: بە گوێرەی ئەو زانیاریانەی دەست پەیامنێرمان هیشام سەعید كەوتووە، درۆنەكە دروستكراوی ئێرانە و لە بناری بەرزاییەكانی قەرەچووغ كەوتووەتە خوارەوە، دوای بیستنی دەنگی درۆنەكە، هێزەكانی پێشمەرگە لە سەنگەرەكانی بەرگری، چوونەتە شوێنی ڕووداوەكە و هێزەكانی سەر بە سوپای عێراقیان لێ ئاگادار كردووەتەوە.

 

لەلایەكی دیكەوە: هەر ئەمڕۆ دەنگۆی كەوتنە خوارەوەی درۆنێك لە سنووری ناحیەی خەلەكان سەر بە قەزای دووكان بڵاوكرایەوە، بەڵام هەرزوو سیروان سەرحەد، قایمقامی قەزای دووكان، تایبەت بۆ ئاڤا، ئەو دەنگۆیەی ڕەت كردەوە و ئاماژەی بەوەكرد، تەنیا ئاگرێك لە بەرزاییەكانی گوندەكە كەوتووەتەوە و هێزەکانی بەرگریی شارستانی و هاونیشتمانیانی ناوچەکە چوون بۆ کۆنترۆڵکردنی و هیچ درۆنێک و تەنێکی نامۆ لەشوێنەکە نەبیندراوە و هێزە ئەمنیشەکانیش لەشوێنی ڕووداوەکەن و لێکۆڵینەوەی زیاتر دەکەن.

 

باکگراوند: لەوەتەی دەستپێكی شەڕی نێوان ئیسرائیل و ئێران، چەند جارێك درۆن و پارچەی مووشەك لە ناوچە جیا جیاكانی هەرێمی كوردستان و عێراق كەوتوونەتە خوارەوە، بێ ئەوەی هیچ زیانێكی گیانیان هەبێت، بەو پێیەی هەردوو وڵات بۆ بۆردومانكردنی یەكتر، ئاسمانی عێراق بەكاردەهێنن.