عێراق گەورەترین کاروانی هاووڵاتیانی لە کەمپی هۆل دەگەڕێنێتەوە

ئاڤا نیوز

دەسەڵاتدارانی عێراق ئامادەکاری دەکەن بۆ گواستنەوەی گەورەترین کاروانی هاووڵاتیان لە کەمپی هۆل لە باکووری ڕۆژهەڵاتی سوریاوە بۆ سەر خاکی عێراق، کە بڕیارە سبەی یەکشەممە جێبەجێ بکرێت.

وێنە گەورەکە: کەمپی هۆل گەورەترین کەمی ژن و منداڵی خێزانەکانی داعشە لە ڕۆژئاوای کوردستان و نزیکەی 50 هەزار ژن و منداڵی لە 60 وڵاتینامەی وڵاتانی جیهان تێدا ڕاگیراوە، لەو ژمارەیەش ئەوانەی هاووڵاتی عێراقین ژمارەیان دەگاتە 18 هەزار کەس.

زانیاریی بەدەستهاتوو: سەرچاوەیەکی ئاگادار بۆ میدیای عێراق ئاشکرای کردووە، "کاروانەکە نزیکەی 950 کەس لەخۆدەگرێت کە بەسەر نزیکەی 250 خێزاندا دابەشبوون." هەروەها ڕوونیکردووەتەوە کە هۆکاری دواکەوتنی پڕۆسەکە، کە بڕیاربوو هەفتەی ڕابردوو ئەنجام بدرێت، گرژییە ئەمنییەکانی نێوان ئێران و ئیسرائیل بووە.

زانیاریی زیاتر: بەپێی زانیارییەکان، ئێستا بارودۆخ بۆ جێبەجێکردنی ئۆپەراسیۆنەکە لەبارە و ئەمڕۆ شەممە نزیکەی 30 پاسی عێراقی چوونەتە ناو خاکی سوریاوە و بڕیارە بەرەبەیانی ڕۆژی یەکشەممە بەرەو کەمپی هۆل بەڕێبکەون بۆ هێنانەوەی خێزانە عێراقییەکان.

ئەوەی پێویستە بیزانیت: لە ساڵی 2021ـەوە حکومەتی عێراق بە هاوکاریی ڕێکخراوە نێودەوڵەتییەکان، دەستی بە گەڕاندنەوەی خێزانە عێراقییەکان کردووە. تا ئێستا زیاتر لە 15 هەزار کەس، کە زۆرینەیان ژن و منداڵن، گەڕێندراونەتەوە و لە کەمپی "جەدعە" لە نەینەوا نیشتەجێ کراون بۆ ئەوەی لە ڕووی کۆمەڵایەتی و دەروونییەوە شیاندنەوەیان بۆ بکرێت.