ئاسایشی نیشتمانیی عێراق هۆشداریی تووند دەدات

ئاڤا نیوز

دەزگای ئاسایشی نیشتمانیی عێراق لە ڕاگەیێنراوێکدا هۆشدارییەکی تووندی دایە ئەو کەس و لایەنانەی کە لە تۆڕە کۆمەڵایەتییەکاندا پڕوپاگەندە و زانیاریی چەواشەکارانە بڵاودەکەنەوە و ڕایگەیاند، هەموو ئەو بڵاوکراوانەی کە ئامانجیان تێکدانی ئاشتیی کۆمەڵایەتی و ئاسایشی نیشتمانی بێت، لەژێر چاودێریی ورددان و ڕووبەڕووی لێپرسینەوەی یاسایی دەبنەوە.

ڕاگەیێنراوی فەرمی: بەگوێرەی ڕاگەیێنراوەکەی دەزگای ئاسایشی نیشتمانیی عێراق، جەختی کردووەتەوە کە بە وردی چاودێریی ئەو ناوەڕۆکانە دەکات کە ئامانجیان وروژاندنی فیتنە و ئاژاوەی تائیفی و سیاسی، شێواندنی ڕاستییەکان و ساختەکردنی ڕووداوەکانە.

دەزگاکە دووپاتی کردەوە، ئازادیی ڕادەربڕین بە واتای بەزاندنی سنوورە یاساییەکان و دەستبردن بۆ ئاسایشی نیشتمانی و بنەما نەگۆڕەکانی وڵات نایەت، هەر وتارێکی هاندەرانە یان ناوەڕۆکێک کە هەڕەشە لە ئاشتیی کۆمەڵایەتی بکات یان زیان بە یەکێتیی گەل و خاکی عێراق بگەیەنێت، بەپێی یاسا و بە هەماهەنگی لەگەڵ دەسەڵاتی دادوەری مامەڵەی لەگەڵدا دەکرێت.

لەلایەکی دیکەوە: ئاسایشی نیشتمانی داوا لە هاووڵاتیان و دەزگاکانی ڕاگەیاندن دەکات هەست بە بەرپرسیارێتیی نیشتمانی بکەن، وردی لە گواستنەوەی زانیاریدا لەبەرچاو بگرن و خۆیان لە هەر شتێک بەدوور بگرن کە ببێتە هۆی بڵاوکردنەوەی ڕق و ترس و دووبەرەکی، یان گومانخستنە سەر دامەزراوەکانی دەوڵەت.