کۆمکاری عەرەبی: پێویستە ڕۆژهەڵاتی ناوەڕاست لە چەکی ئەتۆمی دابماڵرێت

ئاڤا نیوز

ئەمینداری گشتیی کۆمکاری عەرەبی ڕایگەیاند، پێویستە ڕۆژهەڵاتی ناوەڕاست لە چەکی ئەتۆمی دابماڵرێت و بە پشتیوانی سیاسەت و ئیرادەیەکی یەکگرتووی جیهانییش، قەیرانی بەرنامە ئەتۆمییەکەی ئێرانیش هاوشێوەی ساڵانی پێشوو، بەڕێگای گفتوگۆ چارەسەر بکرێت.

وێنە گەورەکە: بۆ تاوتوێکردنی جەنگی نێوان ئیسرائیل و ئێران ئەمڕۆ لە ئیستەنبووڵ، وەزیرانی دەرەوەی هەر 57 وڵاتەکەی ئەندام لە ڕێکخراوی هاریکاری ئیسلامی کۆبوونەوە، لەکۆبوونەوەکەشدا داوای چڕکردنەوەی هەوڵەکان کرا بۆ ڕاگرتنی جەنگی نێوان ئەو دوو وڵاتە و کۆتاییهێنان بە هێرشەکانی ئیسرائیل بۆسەر کەرتی غەززە.

لێدوانی فەرمی: ئەحمەد ئەبوغێت، ئەمینداری گشتیی کۆمکاری وڵاتانی عەرەبی لە کۆبوونەوەکەدا قسەی کرد و ئاماژەی بەوەشکرد، سەرکۆنەی هێرشەکەی ئیسرائیل بۆسەر ئێران دەکات و جەختیش دەکاتەوە لەوەی هێرشکردنەسەر دامەزراوە ئەتۆمییەکان زیان بە خەڵکی مەدەنی ئێران و دوروبەری دەگەیێنێت، ئەوەش کارێکە بە هەموو شێوەیەک ڕەتیدەکەنەوە.

وتیشی، متمانە هەیە تائێستاش دەرفەت بۆ دانووستان ماوە ئەگەر ئیرادەیەکی جیهانی یەکگرتوو هەبێت وەک ساڵانی پێشتر ڕێککەوتن لەسەر بەرنامە ئەتۆمییەکەی ئێرانی لێکەوتەوە، لەم بوارەشدا بە گرنگی دەزانێت ڕۆژهەڵاتی ناوەڕاست لە چەکی ئەتۆمی دابماڵرێت.