وەزیری دەرەوەی ئێران دوای هێرشەکەی ئەمریکا: سبەی لەگەڵ پووتین کۆدەبمەوە

ئاڤا نیوز

لە یەکەم کاردانەوەی فەرمیی ئێران دوای هێرشەکەی بەرەبەیانیی ئەمڕۆی ئەمریکا بۆ سەر وێستەگە ئەتۆمییەکانی، وەزیری دەرەوەی ئەو وڵاتە ڕایگەیاند: ئێستا هیچ ڕێگەیەک بۆ دانوستان و گفتوگۆکردن نییە. 

چی ڕوودەدات؟: بەرەبەیانیی ئەمڕۆ (یەکشەممە)، سەرۆکی ئەمریکا بڕیاریدا هێرش بکرێتە سەر دامەزراوە ئەتۆمییەکانی ئێران، دواتر لە کاتژمێر 02:30ـی بەرەبەیانی فڕۆکە جەنگییەکانی ئەمریکا بە شەش بۆمبی  GBU-57 هێرشیان کردە سەر وێستەگە ئەتۆمییەکانی فۆردۆ، نەتەنز و ئەسفەهان لە ئێران. ئەمەش کاردانەوەی ئێران و وڵاتانی جیهانی بەدوای خۆیدا هێنا. 

 

لێدوانی فەرمی: عەباس عێراقچی، وەزیری دەرەوەی ئێران لە کۆنگرەیەکی ڕۆژنامەوانیدا ڕایگەیاند: سەرۆکی ئەمریکا خیانەتی لە دیپلۆماسییەت کردووە و هەرگیز هەڵوێستەکانی جێگیر نین.

٠ ئەوەی ئێستا ئەمریکا و ئیسرائیل دەیکەن خیانەتە لە دیپلۆماسییەت، چونکە ئەوە لەکاتێکدا ڕوودەدات کە ئێمە سەرقاڵی دانوستان و گفتوگۆ بووین لەسەر سەرجەم کێشەکان.

 

٠ ئەمریکا بەرپرسیارە لە هەموو هێرشەکان و بەدڵنیاییەوە ئێران بێ دەنگ نابێت.

 

٠ داوا لە ئەنجوومەنی ئاسایش و نەتەوە یەکگرتووەکان دەکەین هەڵوێستی تووندیان بەرامبەر ئەو پێشلکارییە فراوانەی ئەمریکا دژ بە ئێران هەبێت؛ ئەمە بابەتێکی جینۆسایدی ئاشکرایە بۆ سەر ئێران. 

٠ ئێمە ماوەی 20 ساڵە ڕوونکردنەوە بۆ هەموو جیهان دەدەین کە بەرنامە ئەتۆمییەکانمان هەنگاوێکی ئاشتییانەیە و دوورە لەوەی بۆ بەرهەمهێنانی چەکی ئەتۆمی بێت، هەندێک وڵاتیش ئەم هەنگاوەیان بە ئەرێنی وەرگرتووە، بەڵام ئەمریکا و ئیسرائیل لەوە تێناگەن.

 

٠ گەلی ئێمە لەوە تێگەیشتووە ئەمریکا و ئیسرائیل نیاز و نییەتیان چییە. 

٠ ئێمە سەرکۆنەی هەموو ئەو هێرشانە دەکەین کە بە بیانووی هەبوونی چەکی ئەتۆمی دەکرێنە سەرمان، ئێمە دەمانەوێت بە هەموو جیهان بڵێینەوە 'ئێران خاوەنی چەکی ئەتۆمی نییە و نازانم بۆ لەوە دەترسن.' 

 

٠ شەرمەزاری و جێگەی داخە بەشێکی وڵاتان پاڵپشتیی ئیسرائیل دەکەن، تەنانەت هاوکاریشی دەکەن. 

٠ دووشەممە کۆبوونەوەم لەگەڵ سەرۆک پووتین هەیە. ڕووسیا هاوبەشی ستراتیژیی ئێمە و ڕاوێژ لەگەڵ یەکتر دەکەین، لەماوەی ڕابردوودا هەموو زانیارییەکمان لەبارەی کۆبوونەوەکانمان لەگەڵ ئەمریکا بەو وڵاتە داوە، کە ئەندامی گرنگی ئەنجوومەنی ئاسایشە. 

٠ تورکیا بە تووندی هێرشەکانی ئەمریکای بۆ سەر ئێران سەرکۆنە کردووە و بەشێکی دیکە لە وڵاتانی ناوچەکەش هەمان هەڵوێستیان هەبووە و پشتیوانیی ئێران دەکەن.

 

٠ ئەوەی ئەمریکا شەوی ڕابردوو بەرامبەر ئێران کردی، زەبرێکی کوشندە بوو بۆ ئاشتیی نێودەوڵەتی و هەموو بنەماکانی مافی مرۆڤ و جاڕنامەی جیهانیی مافی مرۆڤی تێیدا پێشێلکراوە، ئەوەی ئەنجامیدا بۆ ڕزگارکردنی ئیسرائیل و سەرۆکوەزیرانی ئەو وڵاتە بوو.

 

٠ هێزە چەکدارەکانمان لەوپەڕی ئامادەباشیدان و ڕووحی خەڵکی ئێران بریندار بووە. ئێمە لەماف و شکۆی خۆمان پاشەکشە ناکەین و بەردەوام دەبین لە وەڵامدانەوە.

 

٠ ئێمە بژاردەی زۆرمان لەبەردەستدایە بۆ وەڵامدانەوە و باوەڕ بە وڵاتانی ڕۆژئاوا ناکەین. ئەوان لە بەڵێنەکانیان ڕاست ناکەن، ئێستا بەم هەنگاوەیان ئەوەیان زیاتر بۆ ڕوونکردینەوە. 

٠ قسەی من لەگەڵ نوێنەری سەرۆکی ئەمریکا هەمیشە ناڕاستەوخۆ بووە و لە ڕێگەی عومانەوە گفتوگۆمان کردووە، ئەمریکا بەردەوام لە ڕێگەی نێوەندگیرەکانەوە پەیاممان بۆ دەنێرێت ئەگەر شایەنی وەڵامدانەوە بوو، وەڵام دەدەینەوە.