ڕاگەیێنراوی چوار سەرۆکایەتییەکەی عێراق لەبارەی مووچەخۆرانی کوردستان

ئاڤا نیوز

کۆبوونەوەی هەر چوار سەرۆکایەتییەکەی عێراق لە بارەی دۆخی ناوچەکە کۆتایی هات، پرسی مووچەی فەرمانبەرانی کوردستانیش یەکێک لە تەوەرەکان بوو.

چیرۆکی سەرەکی: ئێوارەی ڕۆژی یەکشەممە، لە کۆشکی بەغدا، کۆبوونەوەی سەرۆکایەتییەکانی عێراق لەبارەی دۆخی ناوچەکە بەڕێوەچوو، کە پرسی مووچەخۆرانی کوردستانیش یەکێک بوو لە تەوەرەکانی کۆبوونەوەکە. تا ئێستاش هەردوو سەرۆکایەتی پەرلەمان و ئەنجوومەنی وەزیران دوو ڕاگەیێنراوی جیاوازیان بڵاو کردووەتەوە.

ڕاگەیێنراوی فەرمی: بەگوێرەی ڕاگەیێنراوی سەرۆکایەتی پەرلەمان، یەکێک لە تەوەرەکانی کۆبوونەوەکە تایبەت بوو بە "دۆسیەی دابینکردنی مووچەی فەرمانبەرانی هەرێمی کوردستان، کە تێیدا حکومەتی فیدراڵی ئەو ڕێکارانەی خستەڕوو کە گرتوویەتیەبەر بۆ مسۆگەرکردنی دابەشکردنی مووچە بەشێوەیەکی ڕێک و دادپەروەرانە و بەگوێرەی حوکمە دەستووری و یاساییەکان".

لەلایەکی دیکە: لە ڕاگەیێنراوێکی جیاوازدا، نووسینگەی سەرۆکوەزیرانی عێراق ڕایگەیاند، لە کۆبوونەوەکەدا "بابەتی دابینکردنی مووچەی هەرێمی کوردستانی عێراق تاوتوێ کرا، و داوا لە حکومەتی هەرێم کرا کە بڕیاری دادگای فیدراڵی جێبەجێ بکات؛ تا ڕێگە خۆش بێت بۆ حکومەتی فیدراڵی کە مووچەی فەرمانبەرانی هەرێم دابین بکات و کێشەکانی تریش بەپێی دەستوور و یاسا چارەسەر بکات".

بە تەنیشت ئەو بابەتەوە: سەرۆکایەتی کۆماری عێراقیش لە ڕاگەیێنراوێکدا ئاماژە بۆ ئەوە دەکات، لە کۆبوونەوەکە تاوتوێی بارودۆخی سیاسی، ئابووری و کۆمەڵایەتیی وڵات کرا، گفتوگۆ لەسەر ژمارەیەک بابەتی پەیوەست بە باشترکردنی خزمەتگوزارییەکان و ئاستی گوزەرانی هاوڵاتیان کرا. لەم چوارچێوەیەدا، ئامادەبووان بابەتی دابینکردنی مووچەی فەرمانبەرانی هەرێمی کوردستانیان تاوتوێ کرد و داوایان لە حکومەتی هەرێمی کوردستان کرد کە بڕیاری دادگای فیدراڵی جێبەجێ بکات، تا ڕێگە خۆش بێت بۆ حکومەتی فیدراڵی مووچەی فەرمانبەرانی هەرێم دابین بکات و کێشەکانی تریش بەپێی دەستوور و یاسا چارەسەر بکات.

لە هەمانکاتدا: سەرۆکایەتییەکان جەختیان لەسەر پێویستیی ئەنجامدانی هەڵبژاردنەکان لە کاتی دیاریکراوی خۆیدا و مسۆگەرکردنی پاکی و شەفافیەتی کردەوە.