بەهۆی جەنگی ئێران و ئیسرائیل زیاتر لە هەزار گەشتی ئاسمانی لە کوردستان هەڵوەشاونەتەوە

ئاڤا نیوز

وەزارەتی گواستنەوە و گەیاندنی ھەرێمی کوردستان ڕایدەگەیەنێت کە بەھۆی شەڕ و ئاڵۆزی ناوچەکە و داخستنی ئاسمانی عێراق لە میانی 10 ڕۆژی ڕابردوودا، تا ئێستا ھەزار و 283 گەشتی ھاتن و چوون لە ھەردوو فڕۆکەخانەی نێودەوڵەتیی ھەولێر و سلێمانی ڕاگیراون.

وێنە گەورەکە: لە 13ـی حوزەیرانی 2025، ئیسرائیل بە چەند مووشەکێک ھێرشی کردە سەر ئێران و لە ئەنجامدا ژمارەیەکی زۆر لە فەرماندەکانی سوپا و زانایانی ئەتۆمی کردە ئامانج و دواتریش ئێران بە چەند مووشەکێک تەلئەبیبی بۆردوومان کرد و ھێرشەکان بۆسەر یەکتر تا ئێستا درێژەی ھەیە و بەھۆیەوە ئاسمانیی عێراق و چەند وڵاتێکی دیکە داخران و ئاسمانی بەشێکیان تا ئێستاش بە داخراوی ماوەتەوە.

ڕاگەیێنراوی فەرمی: وەزارەتی گواستنەوە و گەیاندنی حکومەتی هەرێم ڕایگەیاندووە: دوای داخستنی ئاسمانی عێراق بەھۆی جەنگی نێوان ئیسرائیل و ئێران لە ماوەی 10 ڕۆژی ڕابردوودا ژمارەی ئەو گەشتە ئاسمانیانەی ھەڵوەشاوەتەوە بریتیی بووە لە ھەزار و 283 گەشت بە جۆرێک ھەزار و 184 گەشت لە فڕۆکەخانەی نێودەوڵەتیی ھەولێر و 99 گەشت لە فڕۆکەخانەی سلێمانی بووە.