نێچیرڤان بارزانی و كونسوڵی فەرەنسا لەسەر ڕێگریكردن لە تەشەنەسەندنی جەنگ هاوڕابوون

ئاڤا نیوز

سەرۆكی هەرێمی كوردستان و كونسوڵی گشتیی فەرەنسا هاوڕابوون لەسەر ڕێگریكردنی لە تەشەنەسەندنی زیاتری ئەو جەنگەی بەرۆكی ناوچەكەی گرتووە، هەروەها بەپێویستی دەزانن لایەنە ناكۆكەكان پەنا بۆ ڕێگەچارەی دیپلۆماسی ببەن.

وێنە گەورەكە: ماوەی 11 ڕۆژە شەڕ و پێكدادان لەنێوان ئیسرائیل و ئێران هەڵگیرساوە، ئەمریكاش بە هێرشكردنە سەر دامەزراوە سەرەكییە ئەتۆمییەكانی ئێران بە ناڕاستەوخۆ هاتووەتە نێو جەنگەكەوە، سەدان كەس كوژراون و هەزارانیش بریندارن، هیچ ئاسۆیێك بۆ كۆتاییهاتنی جەنگەكە و كۆتاییهێنان بە گرژییە سەربازییەكان لەئارادا نییە.

چیرۆكی سەرەكی: ڕۆژی دووشەممە 2025-06-23، لە دیوانی سەرۆكایەتیی هەرێمی كوردستان، نێچيرڤان بارزانى، سه‌رۆكى هه‌رێمى كوردستان، پێشوازیی له‌ يان برێم، كونسوڵى گشتيى فه‌ره‌نسا له‌ هه‌رێمى كوردستان كرد، له‌ ديدارێكدا لەبارەی دوايين پێشهاته‌كانى دۆخى ڕۆژهه‌ڵاتى ناوه‌ڕاست و ئه‌گه‌ر و لێكه‌وته‌كانى شه‌ڕ و پێكدادان به‌سه‌ر دۆخى ناوچه‌كه‌ و ئارامى و سه‌قامگيريى ناوچه‌يى و نێوده‌وڵه‌تييه‌وه‌ قسە کرا.

ڕاگەیێنراوی فەرمی: بەپێی ڕاگەیێنراوی سەرۆكایەتیی هەرێمی كوردستان، هه‌ردوولا هاوڕا بوون له‌سه‌ر گرنگيى هه‌وڵدان بۆ ئارامكردنه‌وه‌ى دۆخه‌كه‌ و ڕاوه‌ستاندنى جەنگ و پێكدادان، هه‌روه‌ها جه‌ختيان له‌ هه‌ڵوێستى فه‌ره‌نسا و هه‌رێمى كوردستان كرده‌وه‌ كه‌ ڕێگه‌ له‌ ته‌شه‌نه‌سه‌ندنى زياتر بگيرێت و كێشه‌ و ناكۆكييه‌كان به‌ گفتوگۆ و ڕێگه‌ ديپلۆماسييه‌كان چاره‌سه‌ر بكرێن.

لەلایەكی دیكەوە: كونسوڵى گشتيى فه‌ره‌نسا پوخته‌يه‌كى له‌سه‌ر هه‌وڵه‌كانى فه‌ره‌نسا و ئیمانوێل ماكرۆن بۆ وه‌ستاندنى جەنگ و چاره‌سه‌رى ئاشتييانه‌ى كێشه‌كان خسته‌ ڕوو. هه‌ر له‌مباره‌يه‌وه‌ تيشكى خسته‌ سه‌ر هه‌وڵه‌كانى فه‌ره‌نسا له‌ چوارچێوه‌ى ترۆيكاى ئه‌وروپيدا بۆ ڕێگه‌گرتن له‌ ته‌شه‌نه‌سه‌ندنى دۆخه‌كه‌ و گه‌ڕانه‌وه‌ى لايه‌نه‌كان بۆ گفتوگۆ و ڕێگه‌چاره‌ى ديپلۆماسى.

زانیاریی زیاتر: په‌يوه‌ندييه‌كانى فه‌ره‌نسا له‌گه‌ڵ عێراق و هه‌رێمى كوردستان، په‌يوه‌ندييه‌كانى هه‌ولێر ـ به‌غدا و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى ديداره‌كه‌ بوو.