سەرۆکی دادگای باڵای فیدراڵیی عێراق دەست لەکار دەکێشێتەوە

ئاڤا نیوز

سەرچاوەیەکی ئاگادار، دەستلەکارکێشانەوەی جاسم عومەیری، سەرۆکی دادگای باڵای فیدراڵیی عێراق ئاشکرا  دەکات.

زانیاریی بەدەستهاتوو: بەگوێرەی سەرچاوەیەکی ئاگادار کە قسەی بۆ میدیای عێراق کردووە ئاماژە بۆ ئەوە دەکات، "جاسم عومەیری، سەرۆکی دادگای باڵای فیدراڵیی عێراق، نیوەڕۆی ئەمڕۆ دووشەممە دەستلەکارکێشانەوەی خۆی پێشکەش کردووە،" بێ ئەوەی وردەکاریی زیاتر بخاتەڕوو.

ئەوەی پێویستە بیزانیت: دەستلەکارکێشانەوەی لەناکاوی نۆ ئەندامی دادگای فیدراڵی، عێراقی خستووەتە بەردەم بۆشاییەکی دەستووریی کە بە کردەیی ئەو دامەزراوە دادوەرییەی پەکخستووە کە لێپرسراوە لە یەکلاییکردنەوەی ناکۆکییەکان و لێکدانەوەی یاساکان.

لەلایەکی دیکەوە: بەگوێرەی ئەو زانیارییانەی لە دادگای باڵای فیدراڵییەوە دەست ئاڤا میدیا کەوتووە، دوای دەستلەكاركێشانەوەی 6 ئەندامی دادگای فیدراڵی و 3 ئەندامی یەدەگی ئەو دادگایە، دادوەر جاسم عومەیری، سەرۆكی دادگای باڵای فیدراڵی عێراق، داوای خانەنشینبوونی كردووە، داواكە ئاراستەی فایەق زێدان سەرۆكی ئەنجوومەنی دادوەری كراوە، كە پێشتر دادوەرەكانیش داوای دەستلەكاركێشانەوەكەیان ئاراستەی سەرۆكی ئەنجوومەنی دادوەری عێراق كردووەو تا ئێستا پەسەند نەكراوە.

ئەوەی لەوبارەیەوە دەگوترێت: شارەزایان و پەرلەمانتاران دەستلەکارکێشانەوەی ئەو ئەندامانە بە "ئیفلیجبوون لە مێشکی یاسایی دەوڵەتدا" ناو دەبەن و ئاماژە بۆ ئەوە دەکەن، کە ئەم هەنگاوە دەرگای لەبەردەم قەیرانێکی شەرعییەتدا کردووەتەوە کە هەموو جومگەکانی سیستەمەکە دەگرێتەوە و دۆسیە سیادییەکانی پەیوەست بە سەروەری خستووەتە سەر مێزی چاوەڕوانی.