سوودانی و مەشهەدانی: هەڵبژاردن لە وادەی دیاریکراوی خۆیدا بەڕێوەدەچێت

ئاڤا نیوز

سەرۆکوەزیران و سەرۆکی پەرلەمانی عێراق کۆبوونەوە و دەڵێن، پشتیوانیی ڕێکارەکانی تایبەت بە پاراستنی سەروەری خاکی وڵات دەکەن، جەختیش دەکەنەوە لەوەی پشتیوانیی بەردەوامی ئامادەکارییەکان دەکەن بۆ بەڕێوەچوونی هەڵبژاردن لە وادەی دیاریکراوی خۆیدا.

وێنە گەورەکە: بڕیارە ڕۆژی 11ی مانگی 11ی ئەمساڵ هەڵبژاردنی پەرلەمانی عێراق بەڕێوەبچێت، ئەمڕۆش کۆمیسیۆن ماوەی پێشکەشکردنی لیستی کاندیدی لایەنە سیاسییەکانی بۆ سێ ڕۆژی دیکە درێژکردەوە.

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران پێشوازیی لە مەحموود مەشهەدانی، سەرۆکی پەرلەمان کردووە، لەکۆبوونەوەکەشدا جەخت لە گرنگی یەکڕیزی ناوخۆ و پشتیوانی هەنگاوەکانی حکومەت کراوە بۆ گرتنەبەری هەر ڕێکارێکی یاسایی بەمەبەستی پشتیوانی سەروەری خاک و پاراستنی ئارامی وڵات.

ئەوەش خراوەتەڕوو، لە کۆبوونەوەکەدا جەخت لە پەلەکردن لە دەرچواندنی ئەو یاسایانە کراوە کە پشتیوانیی گەشەپێدان دەکەن، هاوکات پشتیوانیی خۆیشیان بۆ بەردەوامی ئامادەکارییەکان دووپاتکردەوە بۆ ئەنجامدانی هەڵبژاردنەکان لە وادەی خۆیدا.