بە درۆن هێرش دەکرێتە سەر دوو سەربازگە لە عێراق

ئاڤا نیوز

بەرەبەیانی سێشەممە، بە چەند درۆنێک هێرشکراوەتە سەر سیستمی ڕاداری سەربازیی بنکەی سەربازیی تاجی لە بە‌غدا و بنکەی "ئیمامی عەلی"ی ئاسمانی لە ڕۆژئاوای شاری ناسریەی ناوەندی پارێزگای زیقار.

ڕاگەیێنراوی فەرمی: سەباح نوعمان، وتەبێژی فەرماندەی گشتیی هێزە چەکدارەکانی عێراق لە ڕاگەیێنراوێکدا ڕایگەیاند: لە کاتژمێر 02:15ی تاوەکو کاتژمێر 03:45ی بەرەبەیانی ئەمڕۆ، بە چەندین درۆنی خۆکوژ هێرشکرایە سەر سیستمی ڕاداری سەربازیی سەربازگەی تاجی لە باکووری بەغدا و بنکەی "ئیمامی عەلی" لە پارێزگای زیقار، بێ ئەوەی هیچ گیان لەدەستدانێک تۆمار بکرێت.

زانیاریی زیاتر: دوابەدوای ئەم هێرشە، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکان، فەرمانی کرد لیژنەیەکی تەکنیکی و هەواڵگریی ئاست بەرز پێکبهێنرێت کە نوێنەرانی سەرجەم دەزگا ئەمنییە پەیوەندیدارەکانی تێدا بێت لەپێناو بەدواداچوون و دەستنیشانکردنی ئەنجامدەرانی هێرشەکە.

ناوبراو وتیشی؛ هێزە ئەمنییەکانی عێراق چوار هێرشی دیکەشی لە چوار پێگەی جیاواز پووچەڵکردووەتەوە.


زانیاریی تایبەت: بەپێی دوایین زانیاری کە بەدەست ئاڤا میدیا کەوتووە، جگە لەهەردوو بنکەی سەربازی تاجی لە بە‌غدا و بنکەی "ئیمامی عەلی"ی ئاسمانی لە ڕۆژئاوای شاری ناسرییە ناوەندی پارێزگای زیقار هەریەکە لەبنکەی سەربازی فیکتۆریا کە بنکەیەکی سەربازی ئەمریکایە لەنێو فڕۆکەخانەی بەغدا کراوەتە ئامانج

زانیاریی زیاتر: بنکەی سەربازی بەلەد کەبنکەیەکی هاوبەشی ئەمریکاو عێراقە ئەویش بەهەمان شێوە کراوەتە ئامانج و زیان بەر وێستگەیەکی سووتەمەنی بنکەکە گەیشتووە.
 
هاوکات، لەدەورووبەری بنکەی سەربازی عەین ئەسەدیش تەقینەوەیەک ڕوویداوە، بەڵام بەپێی زانیارییە سەرەتاییەکانی دەست ئاڤا کەوتووە  تاوەکو ئێستا ئەم هێرشانە زیانی گیانی لێنەکەوتووەتەوە و تەنیا هەندێک زیانی ماددی نەبێت.