پێنج كۆچبەری كورد لە سنووری نێوان بیلاڕووسیا و پۆڵەندا گیریانخواردووە

ئاڤا نیوز

 

ژمارەیەك كۆچبەری كورد لە سنووری بیلاڕووسیا-پۆڵەندا گیریان خواردووە، وەك خۆیان دەڵێن: "خواردن و خواردنەوەیان لەلا نەماوە"، نە بیلاڕووسا ڕێگە دەدات بگەڕێنەوە، نە پۆڵەندا دەهێڵێت بچنە نێو سنوورەكانییەوە.

 

زانیاریی بەدەستهاتوو: بەپێی گرتەیەكی ڤیدیۆیی كە دەست ئاڤا میدیا كەوتووە، پێنج كۆچبەری كورد كە خەڵكی شاری مەریوانی ڕۆژهەڵاتی كوردستانن، لە جەنگەڵەكانی نێوان بیلاڕووسیا و پۆڵەندا گیریان خواردووە، داوای هاوكاری و بەدەنگەوە هاتنەوە دەكەن.

 

لێدوانی فەرمی: ڕەنج پشدەری، چالاكوانی بواری مافەكانی مرۆڤ لە ئەوروپا بە ئاڤای ڕاگەیاند، ئێستا ڕێگەی گەیشتن بە وڵاتانی ڕۆژئاوای ئەوروپا لەڕێگەی وڵاتانی بیلاڕووسیا، سڕبیا و كڕواتیا ئێجگار سەخت بووە و مامەڵەی پۆلیسی پاسەوانی سنوور و ترسناكی ڕێگاكە، سەلامەتی ژیانی كۆچبەرانی خستووەتە دۆخێكی مەترسیدارەوە.

 

بە تەنیشت ئەم بابەتەوە: هەفتەیەك لەمەوبەر، دەیان كۆچبەری كورد لە ڕێگەی سڕبیا دیارنەماون، كە ویستوویانە بەڕێگەی وشكانی و بەنێو جەنگەڵەكانەوە خۆیان بگەیەننە كڕواتیا، بەڵام دواتر دەنگیان نەماوە.

پێدراوە ڕاستییەكان: بەپێی زانیارییەكان لەزاری چالاكوانانی بواری مافی پەنابەران، كۆچبەرە كوردەكان لە كڕواتیا دەستگیر كراون و مۆبایل و كەرەستە كەسییەكانیان لێ وەرگیراوە و شكێندراوە، ڕاپێچی گرتووخانە كراون و كەسیش لە دەستگیركردنیان ئاگادار نەكراوەتەوە.