مەسرور بارزانی پێشوازی لە ئاگربەستی ئێران و ئیسرائیل دەکات؛  گفتوگۆ تاكە ڕێگەچارەیە

ئاڤا نیوز

مەسرور بارزانی پێشوازی لە ڕاگەیاندنی ئاگربەست لەنێوان ئێران و ئیسرائیل دەکات و پێیوایە دانبەخۆداگرتن و گفتوگۆ تاكە ڕێگەچارەیە. 

بڵاوکراوەی فەرمی: مەسرور بارزانی، سەرۆکوەزیرانی هەرێمی کوردستان لە پلاتفۆرمی ئێکس پەیامێکی لەبارەی ئاگربەستی نێوان ئێران و ئیسرائیل بڵاو کردووەتەوە و دەڵێت: پێشوازی لە ڕاگەیاندنی ئاگربەست دەکەم لەلایەن سەرۆک دۆناڵد ترەمپەوە. 

مەسرور بارزانی لە پەیامەکەیدا دووپاتی کردووەتەوە: "خۆگرتن و دیالۆگ تەنها ڕێگایە بۆ تێڕوانین لە داهاتوویەکی باشتر، ناوچەکە پێویستی بە سەقامگیری و ڕێزگرتن لە دراوسێ و هاوبەشەکان هەیە، پێویستی بەو بڕیارانە هەیە کە لەسەر بنەمای ژیری و سەرکردایەتیی بەرپرسیارانە دەدرێن".

باکگراوند: دوای 12 ڕۆژ لە جەنگی سەختی نێوان ئێران و ئیسرائیل، لەکاتێکدا ئێران هێرشی کردە سەر بنکەی سەربازیی ئەمریکا لە قەتەر و خەریک بوو وڵاتانی کەنداو لە شەڕەکە بگلێن، شەوی ڕابردوو کاتژمێر 12:20 خولەک دۆناڵد ترەمپ بە پەیامێک جیهانی شۆک کرد و ڕایگەیاند: پیرۆزبایی لە هەمووان دەکەم، جەنگ شەش کاتژمێری تر کۆتایی دێت. کاتژمێر حەوتی بەیانیش بە کاتی هەولێر جەنگ کۆتایی هات و ئاگربەست ڕاگەیێنرا، وڵاتانی جیهانیش پێشوازییان لە ئاگربەستەکە کرد و دڵخۆش بوون بە کۆتاییهاتنی جەنگەکە.