ئاشکرا بوو؛ مۆساد بە تەلەفۆن هەڕەشەی لە فەرماندەکانی سوپای پاسداران کردووە

ئاڤا نیوز

هەمان ئەو ڕۆژەی ئیسرائیل هێرشی کردە سەر ئێران، سیخوڕەکانی مۆساد بە تەلەفۆن هەڕەشیان لە فەرماندە سەربازییەکانی ئێران کردووە و پێیان گوتوون لە ماوەی 12 کاتژمێردا وڵاتەکە جێبهێڵن دەنا هێرشیان دەکەنە و سەر و دەکوژرێن.

چیرۆکی سەرەکی: دوای 12 ڕۆژ جەنگی قورس و ڕاگەیاندنی ئاگربەست لەنێوان ئیسرائیل و ئێران لە 24ی مانگدا، زانیاری نوێ ئاشكرا بووە، دەرکەوتووە ئیسرائیل 13ی مانگ کاتێک هێرشی کردووەتە سەر ئێران، پێشوەختە بە تەلەفۆن هەڕەشەی لە فەرماندەکانی سوپای پاسداران کردووە.

زانیاریی بەدەستهاتوو: سێ بەرپرسی ئیسرائیلی قسەیان بۆ ڕۆژنامەی واشنتن پۆستی ئەمریکی کردووە، ڕۆژنامەکە تۆمارێکی دەنگی چوار دەقەیی بڵاوکردووەتەوە کە سیخوڕەکانی دەزگای هەواڵگریی ئیسرائی (مۆساد) بە زمانی فارسی و بە تەلەفۆن قسە لەگەڵ فەرماندەکانی سوپای پاسداران دەکەن.

واشنتن پۆست بڵاوی کردووەتەوە لەلایەن مۆسادەوە تەلەفۆن بۆ زیاتر لە 20 بەپرس و فەرماندەی سەربازیی ئێران کراوە. سیخورەکانی مۆساد بە بەرپرس و فەرماندەکان دەڵێن: تاوەکو 12 کاتژمێری تر خۆت و هاوژین و منداڵەکانت ئێران جێبهێڵن، ئەگەر وا نەکەی، هەمووتان دەکوژین، خۆت و منداڵەکانیشت.

لە هەمان کاتدا: بەهەمانشێوە سیخوڕەکانی مۆساد نامەی دەنگی هەڕەشەئامێزیان ناردووە بۆ هەندێک لە بەرپرسەکان، بە یەکێکیان دەڵێن: تۆ لە لیستی ڕەشی ئێمدایت، ئامۆژگاریت دەکەین، تۆ 12 کاتژمێرت لەبەردەمدایە  بۆ ئەوەی خۆت و ماڵ و منداڵت ڕزگار بکەیت. پێشی دەڵێن: مۆساد لە پەنا گوێتدایە، هێندە نزیکین لێتەوە.

باکگراوند: لە جەنگی 12 ڕۆژەی نیوان ئیڕان و ئیسرائیل کە 13 ئەم مانگە بە هێرشی ئیسرائیل هەڵگیسرا و 24ی مانگیش ئاگربەست ڕاگەیێنرا، زیاتر لە 50 بەرپرس و فەرماندەی باڵای سەربازی و 17 زانای ئەتۆمی ئێران کوژران، زۆربەشیان لە ڕۆژی یەکەمی هێرشەکەدا کرانە ئامانج