لە ڕۆژانی جەنگ گەشتیارانی هەرێمی کوردستان گرفتی گەڕانەوەیان چارەسەر کراوە

ئاڤا نیوز

 

بەرلەوەی گەشتە ئاسمانییەکانی هەرێمی کوردستان و وڵاتانی جیهان ئاسایی ببێتەوە، گرفتی ئەو گەشتیارانەی هەرێمی کوردستان چارەسەر کراوە کە لە دەرەوەی وڵات گیریان خواردبوو. 

 

چیرۆکی سەرەکی: بەهۆی جەنگی 12 ڕۆژەی نێوان ئیسرائیل و ئێران ئاسمانی کوردستان و عێراق بەڕووی هاتووچۆی فڕۆکە داخرا و ئەمەش بووە هۆی دروستبوونی گرفت بۆ گەڕانەوەی هەزاران گەشتیار لە وڵاتانی جیهانەوە، هەر زوو لەسەر فەرمانی سەرۆکوەزیران مەسرور بارزانی، حکومەتی هەرێمی کوردستان لە ڕێگەی پێکهێنانی لیژنەیەکی هاوبەش لە وەزارەتی ناوخۆ و فەرمانگەی پەیوەندییەکانی دەرەوە، کار لەسەر گەڕاندنەوەی ئەو گەشتیارانە کرا و گرفتەکانیان بۆ چارەسەر کرا. 

لێدوانی فەرمی: سروە ڕەسووڵ، بەڕێوەبەری گشتیی ناوەندی هاوبەشی هەماهەنگی قەیرانەکان لە وەزارەتی ناوخۆ بە ئاڤای گوت: پێش دەستپێکردنەوە گەشتە ئاسمانییەکان، کێشەی سەرجەم ئەو هاونیشتمانیانە چارەسەرە کە لە دەرەوە گیریان خواردبوو، ئەمەش لەڕێگەی دابینکردنی ڤیزەی ترانزێت و دابینکردنی پاس و هەموو هاوکارییەک بۆ گەڕاندنەوەیان.

زانیاریی زیاتر: لە ماوەی 12 ڕۆژی جەنگی ئێران و ئیسرائیل، کێشەی گەڕانەوە بۆ 14 هەزار و 165 هاونیشتمانی چارەسەر کرا، کە لە ڕێگەی هێڵە گەرمەکان و پڕکردنەوەی فۆرمی ئەلیکترۆنی، پەیوەندییان بە ژووری ئۆپەراسیۆن کردووە و کێشەی گەڕانەوەیان بۆ چارەسەر کراوە.