واشنتن پێداگرە لەسەر ئەوەی  پێگە ئەتۆمییەکانی ئێرانی لەناوبردووە

ئاڤا نیوز

 

لەبارەی لەناوچوونی پێگە ئەتۆمییەکانی ئێران، سەرۆکی ئەمریکا و ئیدارەکەی دووپاتی دەکەنەوە کە بەرنامەی ئەتۆمی ئێران لەناوچووە.

 

چیرۆکی سەرەکی: دوای 12 ڕۆژ لە جەنگی نێوان ئیسرائیل و ئێران، سەرۆکی ئەمریکا ئاشکرای کرد، هەردوو وڵات ڕازیبوون بە ئاگربەست، کە لە بەیانیی سێشەممەوە کەوتە بواری جێبەجێکردنەوە.

 

بڵاوکراوەی فەرمی: دۆناڵد ترەمپ، سەرۆکی ئەمریکا لە پێگەی ترووس سۆشیاڵی خۆی وەڵامی ئەو ڕاپۆرتە میدیایانەی ئەمریکای دایەوە، کە باس لەوە دەکەن کە هێرشەکانی ئەمریکا بۆ سەر ئێران تەنیا بۆ چەند مانگێک بەرنامەی ئەتۆمی ئێرانی دواخستووە، لە وەڵامی ئەمەدا دەڵێت، پێگە ئەتۆمییەکانی ئێران بەتەواوی لەناوچوون.

 

زانیاریی بەدەستهاتوو: تامی برووس، وتەبێژی وەزارەتی دەرەوەی ئەمریکا، کۆنفرانسێکی ڕۆژنامەوانییدا بۆ میدیاکان ئاشكرای کرد،'' ئێران و ئیسرائیل ڕازیبوون بە ئاگربەست و ئێستا دۆخێکی باش هاتووەتە ئاراوە، ئێستا ئێران چەکی ئەتۆمی نییە و نابێت هەیبێت''.

 

- لەبارەی سەرۆکی ئەمریکاشەوە دەڵێت، ترەمپ پیاوێکی بازرگانە دەیەوێت ئاسایشی وڵاتەکەی لە ڕێگەی بازرگانییەوە بپارێزت.

 

باکگراوند: لە دەیەم ڕۆژی جەنگی نێوان ئێران و ئیسرائیل، ڕۆژی یەکشەممە (22-6-2025) هێزی ئاسمانیی ئەمریکا هەر سێ دامەزراوەی ئەتۆمیی فۆردۆ، نەتەنز و ئەسفەهانی بە شەش بۆمبی GBU-57 و چەندین جۆر مووشەکی دیکە پێگە ئەتۆمییەکانی ئێرانی بۆردوومان کرد