لە سنووری پارێزگای هەولێر زیاتر لە 80 هەزار کارتی زەوی گۆڕاوە بۆ سەنەدی یاسایی

ئاڤا نیوز

بەهۆی گۆڕینی هەزاران کارتی زەوی بۆ سەنەدی یاسایی، هەزاران هاووڵاتیی لێی سوودمەند بوون و ئێستا بوونەتە خاوەنی ڕاستەقینەی مۆڵکەکانیان.

 

وێنە گەورەکە: بەهۆی ئەوەی لەماوەی ڕابردوودا بەشێکی زۆر لە هاووڵاتییان زەوییەکانیان کارت بوو، بەهۆیەوە توانای مامەڵەی یاساییان نەبوو بەسەر زەوییەکانیان وەکو موڵکی ڕاستەقینە، بەڵام لەکابینەی نۆیەمی حکومەتی هەرێمی کوردستان گرنگییەکی زۆر دراوە بە چارەسەری گرفتی هاووڵاتیان و هەزاران کەس لە گۆڕانکاریی زەوی کارت  بۆ سەنەدی یاسایی سوودمەندبوون. 

 

لێدوانی فەرمی: د. لوقمان عومەر حسێن، بەڕێوبەری گشتیی تۆمارکردنی خانوبەرە لە هەرێمی کوردستان، ڕایگەیاندووە، لە  21-10-2021 تاوەکو مانگی 6ـی 2025 زیاتر لە 80 هەزار کارتی زەوی گۆڕاوە بۆ سەنەدی یاسایی، ئەمەش وەکو جێبەجێکردنی کارنامەی کابینەی نۆیەمی حکومەتی هەرێمـی کوردستان کە یەكێک لە بنەماکانی بریتییە لە  چارەسەرکردنی کێشەی هاووڵاتیان و پێشکەشكردنی خزمەتگوزاریی زیاتر بۆیان.

زانیاریی زیاتر: بەڕێوبەری گشتیی تۆمارکردنی خانوبەرە لە هەرێمی کوردستان، دەڵێت، تەنیا لەهەفتەی ڕابردوود هەزار و 680 کارت لە کەرتی بێرات و لە کەرتی 42ـی کانی قڕژاڵە 33 زەوی کارت کراون بە سەنەد و ڕادەستی شارەوانی کراون.

ئەوەی پێویستە بیزانیت: بەهۆی گۆڕینی زەوی کارت بۆ سەنەدی یاسایی، زەوییەکان دەبێتە موڵکی کەسەکە و دەتوانێت هەموو مامەڵەیەکی یاسایی پێوە بکات، بەڵام لە ڕابردوو بەهۆی ئەوەی زەوییەکانیان کارت بوو نەیاندەتوانینی بە تەواوی مامەڵەی پێوە بکەن.