مانگی داهاتوو گەشتی عومرە دەستپێدەكاتەوە

ئاڤا نیوز

لە سەرەتای مانگی داهاتووەوە گەشتی عومرە دەستپێدەكاتەوە، بۆ ئەم مەبەستەش كۆمپانیاكانی حەج و عومرە دەستیان بە ئامادەكارییەكان كردووە و سەرەتای هەفتەی داهاتووش بەڕێوەبەرایەتیی حەج و عومرەی هەرێمی كوردستان، كۆدەبێتەوە و ڕێنمایی نوێ بۆ كۆمپانیاكان دەردەكات.

وێنە گەورەكە: دوای كۆتاییهاتنی وەرزی حەج و گەڕانەوەی سەرجەم حاجییان لە سعوودیە، چاوەڕوان دەكرا لە نزیكترین كاتدا گەشتەكانی عومرە بەڕێگەی وشكانی و ئاسمانی دەستپێبكەنەوە، بەڵام بەهۆی هەڵگیرسانی جەنگی نێوان ئیسرائیل و ئێران و وەستانی گەشتە ئاسمانییەكان و ناسەقامگیری دۆخی ناوچەكە، گەشتی عومرە لە وادەی دیاریكراوی خۆیدا دواكەوت.

لێدوانی فەرمی: كاروان ستونی، وتەبێژی بەڕێوەبەرایەتیی حەج و عومرەی هەرێمی كوردستان تایبەت بە ئاڤا ڕایگەیاند، بەهۆی جەنگی ئێران و ئیسرائیل، هیچ وادەیەک بۆ دەستپێکردنەوەی گەشتەکانی عومرە دیارینەکرابوو، بەڵام دوای ڕاگەیاندنی ئاگربەست و ئاساییبوونەوەی دۆخەكە، دەست بە ئامادەکارییەکان دەکەن و بەهەموو ئەگەرێكەوە مانگی داهاتوو گەشتەکان دەست پێدەکەنەوە.

زانیاریی تایبەت: بۆ ئەنجامدانی گەشتی نوێی عومرە، بەڕێوەبەرایەتیی حەج و عومرە ڕۆژی یەكشەممە 29ـی حوزەیران كۆدەبێتەوە، ڕێنمایی نوێ بۆ کۆمپانیاكانی حەج و عومرە دادەڕێژێت ، دواتر وادەیەك دیاری دەكرێت بۆ ئەوەی سەرجەم كۆمپانیاكان كە ژمارەیان 394 كۆمپانیایە، سەردانی بەڕێوەبەرایەتییەكە بكەن و گرێبەستەكانی بردنی عومرەكاران واژۆ بكەن، بڕە پارەیەكیش وەك بارمتە دابنێن و لەكاتی دیاریكراودا ئەو بڕە پارەیان بۆ دەگەڕێندرێتەوە.

زانیاریی زیاتر: ئەگەر هیچ پێشهاتێكی نوێ ڕوونەدات، لە سەرەتای مانگی داهاتووەوە گەشتەكانی عومرە بە ڕێگەی وشكانی و ئاسمانی دەستپێدەكەنەوە، ئەمە بە وتەی وتەبێژی حەج و عومرەی كوردستان.