هەولێر و بەغدا بەیەكەوە چارەسەری گرفتی خانەنشینانی هەرێمی كوردستان دەكەن

ئاڤا نیوز

شاندێکی وەزارەتی دارایی حکومەتی فیدراڵ سەردانی وەزارەتی دارایی هەرێمی کوردستانیان کرد و گفتوگۆیان سەبارەت بە چەند پرسێكی تایبەت بە خانەنشینانی سەربازی و شارستانیی هەرێمی كوردستان كرد.

چیرۆکی سەرەکی: ڕۆژی چوارشەممە 2025-06-25، شاندێکی وەزارەتی دارایی حکومەتی فیدراڵ بە سەرۆکایەتی د. حەیدەر جاسم بەڕێوەبەری گشتی سندوقی خانەنشینی عێراق سەردانی وەزارەتی دارایی و ئابووری هەرێمی کوردستانیان کرد.

ڕاگەیێنراوی فەرمی: وەزارەتی دارایی هەرێمی كوردستان لە ڕاگەیێنراوێکدا ڕاگەیاند: گفتوگۆ لەسەر بابەتی لێبڕینی لە 3%ـی مووچەی فەرمانبەران و خانەنشینانی هەرێمی کوردستان کرا کە لەسەر بنەمای جێبەجێکردنی یاسای خانەنشینی یەکگرتووی عێراق و لەسەر داوای وەزارەتی دارایی عێراق لە ڕێکەوتی 2014-01-01 تا 2024-06-30 لە ڕێکەوتی 2025-06-01ـەوە مانگانە بەقیست لێیان وەردەگیرێتەوە.

زانیاریی زیاتر: لە بەشێکی تری کۆبوونەوەکەدا پرسی خانەنشینی هێزەکانی پێشمەرگە و چۆنیەتی هەژمارکردنی خزمەت و مووچەکانیان لەچوارچێوەی یاسای خانەنشینی یەکگرتووی عێراق گفتوگۆی لەبارەوە کرا.

لێدوانی فەرمی: سەرچاوەیەك لە وەزارەتی دارایی هەرێمی كوردستان بە ئاڤا میدیای ڕاگەیاند: شاندەكەی عێراق لە هەرێمی كوردستان دەمێننەوە و گفتوگۆكانی نێوان هەردوولا بەردەوام دەبێت.

ئەوەی پێویستە بیزانیت: لەڕێکەوتی2025-05-13، لەلایەن وەزارەتی دارایی و ئابووری هەرێمی کوردستانەوە بە فەرمی بانگهێشتی سەرۆکی دەستەی خانەنشینی نیشتیمانی و بەڕێوەبەری گشتی سندوقی خانەنەنشینی عێراق کرا بەمەبەستی کۆبوونەوە و گفتوگۆ لەسەر چارەسەرکردنی کێشە و گرفتەکانی تایبەت بەخانەنشینان لەهەرێمی کوردستان.