دوو گەنجی سلێمانی "بەرزە کۆلیلە"ی عەباسی کەمەندی لەڕێگەی ئاڤاوە بڵاودەکەنەوە

ئاڤا نیوز

دوو گەنجی شاری سلێمانی بەرهەمێکی هونەرمەند عەباسی کەمەندی نوێ دەکەنەوە و بۆ یەکەمجاریش لەڕێگەی ئاڤا میدیاوە بڵاوی دەکەنەوە.

چیرۆکی سەرەکی: وەلید ئەحمەد و ژەنیار ئارام، دوو گەنجی هونەرمەندن و لە شاری سلێمانی دەژین، وەلید ژەنیاری ئامێری فلووتە و خاوەنی چەند بەرهەمێکی تایبەت بە خۆشییەتی. هەر لەگەڵ ژەنیار ئارامدا چەند پڕۆژەیەکی هاوبەشیان هەبووە و بەردەوامیشن.

لە نوێترین بەرهەمیشیاندا گۆرانی (بەرزە کۆلیلە)ی هونەرمەندی دیاری کورد عەباسی کەمەندییان نوێکردووەتەوە و ڤیدیۆ کلیپیان بۆ دروستکردووە.

ئەوەی پێوستە بیزانیت: بەرزە کۆلیلە یەکێکە لە دیارترین گۆرانییەکانی عەباسی کەمەندی و پێشتر لە ئەلبوومی پرشنگدا بڵاوبووەتەوە و سەرجەم گۆرانییەکانی ئەلبوومەکە گرووپی کامکاران کردوویانە.

بۆچی گرنگە: ئەوەی گرنگە ئێستا ئەم بەرهەمە بۆ یەکەمجار هاوکات لەگەڵ چەناڵی فەرمی خۆیان لە ئاڤا میدیاش بڵاودەبێتەوە.