فایلی خەڵک؛ بەهۆی دواکەوتنی گەڕانەوەی بەڵگەنامەی لەدایکبووان هاووڵاتیان نیگەران دەبن

ئاڤا نیوز

ماوەیەکە لە نووسینگەی لەدایکبووانی هەولێر بەڵگەنامەی لەدایکبوون زۆر دوادەکەوێت، ئەمەش نیگەرانی هاووڵاتیانی لێکەوتووەتەوە. بەڕێوەبەرایەتیی لەدایکبووان و مردووانی هەولێریش دوو هۆکار بۆ دواکەوتنی ئاشکرا دەکەن.

چیرۆکی سەرەکی: دوای لە دایکبوونی منداڵان لە نەخۆشخانەی لەدایکبوون پێویستە بەڵگەنامەی لەدایکبوون بە خێزانەکان بدرێت بۆ ئەوەی ناسنامە بۆ منداڵەلە دروست بکرێت و بەشە خۆراکی مانگانەی بۆ ببەسترێت، بەڵام بەهۆی چەند کێشەیەک لە نووسینگەی لەدایکبوونی هەولێر پێدان و گەڕانەوەی بەڵگەنامەی لە دایکبوون بە خێزانەکان دوادەکەوێت ئەمەش نیگەرانی لەلای هاووڵاتیان دروستکردووە.

لێدوانی تایبەت: د. شاگوڵ کەمال، بەڕێوەبەری نووسینگەی لەدایکبووان و مردووانی هەولێر بە ئاڤا میدیای ڕاگەیاند، دوو هۆکاری سەرەکی هەیە وای کردووە بەڵگەنامەکان دوا بکەوێت.

- بەهۆی بڕیاری خانەنشین بوون، فەرمانبەرمان کەمبووەتەوە کە دەبێت بەڵگەنامەکان سکان بکرێن و تۆمار بکرێن کە چەندینجار داوای فەرمانبەرمان کردووە بۆمان نەهاتووە. هاوکات بەهۆی دۆخی مووچەش فەرمانبەر ناتوانێت هەموو ڕۆژ دەوام بکات، ئەمەش یەکێکە لە هۆکارەکان کە مامەڵەکان دوادەخات،

- ماوەی مانگێکە کۆمپانیایەک دەستبەکار بووە بە ناوی ئینگل پۆست کە بەڵگەنامەکان بۆ هاووڵاتیان دەگەینێت، بەڵام بەڵگەنامەکان لەسەر یەک کۆبۆتەوە، بۆیە ئەو ماوەیە فشار کەوتۆتە سەر کۆمپانیاکە و بەڵگەنامەکان دواکەوتووە.

د. شاگوڵ کەمال ئاماژە بەوە دەکات، سەرەڕای کەمی فەرمانبەر هەموو ئەو هاووڵاتیانەی لە هەولێر منداڵیان دەبێت بە کورد و عەرەب و سووری و بیانی، "بەڵگەنامەکانیان لەلایەن ئێمە بۆ دروست دەکرێت، ئەمەش وادەکات کارەکان دوابکەوێت".

دەشڵێت، هاووڵاتیان دڵنیا دەکەینەوە بەڵگەنامەکان دەگاتە دەستیان ئەگەر کەمێکیش دوابکەوێت، بەڵام ئەم کێشەیە کاتییە و کۆمپانیای ناوبراو ڕۆژانە بەڵگەنامەکان دەگەێنێتە دەست هاووڵاتیان.