میدیاکانی ئەمریکا ترەمپ تووڕە دەکەن و زانیارییەکی زۆر نهێنیی مۆساد ئاشکرا دەکات

ئاڤا نیوز

میدیاکانی ئەمریکا لەبارەی هێرشکردنە سەر دامەزراوە ئەتۆمییەکانی ئێران لەلایەن ئەمریکاوە ترەمپ تووڕە دەکەن و دەڵێن وێستگە ئەتۆمییەکانی ئێران بەتەواوی لەناو نەچوون، ئەویش نهێنییەکی مۆساد ئاشکرا دەکات.

چیرۆکی سەرەکی: میدیاکانی ئەمریکا بەپشت بەستن بە زانیاریی هەواڵگری ئەمریکا، دەڵێن، وێستگە ئەتۆمییەکانی ئێران بەتەواوی لەناو نەچوون، بەتایبەتی نیویۆرک تایمز دەڵێت، ئەگەر ئێران بیەوێت و بەخێرایی کاری لەسەر بکات، دەتوانێت لەماوەی کەمتر لە شەش مانگ دەست بکاتەوە بە کارکردن لە ویستگە ئەتۆمیەکانی.


بڵاوکراوەی فەرمی: رۆژنامەی واشنتن پۆست ڕاپۆرتێکی بڵاو کردووەتەوە و دەڵێت، لە هێرشەکەی ئەمریکا کۆگاکانی یۆرانیۆم زیانیان بەرنەکەوتووە و کۆگاکان بەتەواوی لەناو نەچوون.

لێدوانی فەرمی: ترەمپ توڕە بووە بەم ڕاپۆرتە و وتوویەتی، ئێوە چی دەڵێن، سیخوڕەکانی مۆساد دوای بۆردوومانەکە چوونەتە ناو وێستگەکە چوونەتە خوارەوە زانیاریی تەواویان هێناوەتەوە بەچاوی خۆیان بینیویانە وێستگەکە بەتەواوی خاپوور بووە. ئەوەندە خراپ لێیان داوە، بەساڵ پیتاندنی یۆرانیۆمیان دواخستووە.

لە بەرامبەردا: ئیسرائیل ڕایگەیاندووە، ئێمە زانیاریی نهێنیمان پێداویت بۆ خۆت، نەک بێی لەسەر شاشە باسی بکەیت بۆ جیهان.

لەلایەکی دیکەوە: عەباس عێراقچی، وەزیری دەرەوەی ئێران دەڵێت، لەمەولا شتی باشتر دەکەین بۆ پاراستنی وێستگە ئەتۆمییەکانمان و بەهیچ شێوەیەکیش دەستبەرداری ئەو بەرنامەیە نابین.

باکگراوند: بەرەبەیانی ڕۆژی یەکشەممە 2025-06-22، شەش فڕۆکەی B2 هێرشیان کردە سەر وێستگەی فۆردۆ، 12 مووشەکی جۆری GBU57 پەناگەبڕیان بۆ لێدان لە دامەزراوەکە بەکارهێنا، کە کێشی هەریەکەیان زیاتر لە 13 تۆن بوو. وێستگەکەیان خاپوور کرد، ژێردەریاییەکانی هێزی دەریایی ئەمریکاش بەشدارییان لە هێرشەکەدا کرد و 30 مووشەکی کرۆزیان لە جۆری TLAM ئاراستەی دامەزراوەکانی نەتەنز و ئەسفەهان کرد، لەگەڵ ئەوەشدا فڕۆکەیەکی B2 دوو بۆمبی پەناگەبڕی ئاراستەی دامەزراوەی نەتەنز کردووە.