باندێکی ئافرەتان لە هەولێر بە ناوی ژنی دووەمەوە قۆڵی پیاوان دەبڕن

ئاڤا نیوز

باندێکی ئافرەتان لە هەولێر، سێ پیاو هەڵدەخەڵەتێنن و ژنی دووەمیان بۆ دێنن، دواتر جێیان دێڵن، بە گوتەی ئەو سێ پیاوە، باندەکە مامۆستای ئایینیشیان لەگەڵە، پۆلیسیش دەڵێت بەدواداچوون دەکەین.

چیرۆکی سەرەکی: لە هەولێر سێ پیاو کە خێزاندارن، لەڕێگەی باندێکەوە فێڵیان لێ کراوە و ژنی دووەمیان هێناوە و ژنەکانیان دوای ماوەیەک پارەیەکی زۆریان لێ خواردوون و هەڵاتوون.

لێدوانە فەرمییەکان:

یەکێک لە قوربانیەکان بە ئاڤای ڕاگەیاند، "ئەمانە گرووپن و هەمووی یەک تیمن، لەڕێگەی ئافرەتێکەوە کە سەرۆک گرووپەکەیە ئافرەتێکی بۆ دۆزیمەوە، لەڕێگەی مەلایەک کە هەر لەگەڵ گرووپەکە بوو مارەم کرد،  دوای سێ مانگ نزیک 10 ملیۆن دیناری لێ وەرگرتم و ون بوو.

ئەو قوربانییە دەشڵێت: دوای وون بوونی وەک شێتم لێهاتبوو هێندە غەریبیم دەکرد، هەموو ڕۆژێک دەگریام تەنها یەک جاری دیکە بیبینمەوە.

قوربانییەکی دیکە بۆ ئاڤا وتی: مامۆستایەکی ئایینی کە ئافرەتی زۆری لەلایە، ئافرەتێکی بۆ دەستنیشان کردم و هەر بە تەلەفۆن لێی مارەکردم، بەڵام من نەمزانی فێڵم لێ دەکەن و لەدەستم هەڵدێت، چونکە هەمووی دوو جار لەنزیکەوە نەمبینی و لەگەڵی نەبووم، دوای ئەوەی ژنەکەم هەڵات چوومەوە لای مەلاکەو ئەویش پێی وتم، واز لەو ژنە بێنە وەرە دانەیەکی دیکەت لێ مارە دەکەم تەنها بە 500 هەزار دینار .

زانیاریی زیاتر: ئەو سێ پیاوە کەسیان کەس ناناسێت بەڵام دوای ئەوەی فێڵیان لێکراوە بوونەتە هاوڕێ و باسی دەردی خۆیان بۆ یەکتری دەکەن، و لەڕێگەی ئاڤا میدیاشەوە پەیامێک بۆ هەموو گەنجان و پیاوان دەنێرن ئاگاداری خۆیان بن و وەک ئەوان تێنەکەون.

بۆچوونی لایەنی بەرامبەر: کارزان ساڵح، وتەبێژی پۆلیسی هەولێر بە ئاڤا میدیای ڕاگەیاند: بەدواداچوون بۆ ئەو ماڵە دەکەین کە ئەم کارانەی لی ئەنجام دەدرێت، وە داواش لەو قوربانیانە دەکەین بێن و لە بنکەی پۆلیس سکاڵا تۆماربکەن بۆ ئەوەی پەڕاوی لێکۆڵینەوەیان بۆ بکەینەوە، و تۆمەتباران بە سزای خۆیان بگەیەنین.