بیرێکی ئاو لە ناوچەی سوورچیایەتی بەرناکەوێت

ئاڤا نیوز

بە قسەی خەڵکی ناوچەکە، لە دەشتی سوورچیاتی نزیک ئاکرێ، بیرێکی ئیرتیوازی هەیە، بەرناکەوێت، ئەوەی بەردی گورچیلەی هەیە، بیخواتەوە دوای ماوەیەک بەردەکە فڕێ دەدات. پزیشکێکیش دەڵێت، ڕەنگە ئاوەکە پاک بێت، بەڵام فڕێدانی بەردی گورچیلە هەروا ئاسان نییە.

چیرۆکی سەرەکی: ساڵی 2017، خێرخوازێک لە گوندی کۆلکای دەشتی سوورچیاتی بیرێکی لێداوە 200 مەتر قوڵە. ئەوکاتە وتیان ئاوەکەی قورسە لەسەر گەدە، یان تامێکی تاڵایی دەدات. ئاوەکەیان برد بۆ تاقیگە و پشکنین، دەرکەوت بیرەکە پاکترین ئاوی هەیە.

لێدوانی فەرمی: لوقمان سوورچی، کە خۆبەخشە و سەرپەرشتی بیرەکە دەکات بە ئاڤا میدیای ڕاگەیاند، "رۆژانە دەیان کەس لەهەموو شوێنە جیاوازەکانی کوردستانەوە دەچن بۆ گوندەکە ئاوی ئەو بیرە دەخۆنەوە و دەبەش پڕ دەکەن لەگەڵ خۆیان دەیبەنەوە. ئەوەی بەردی گورچیلەی هەبووەو ئاوی ئەو بیرەی خواردووەتەوە چەند جارێک، یەکسەر بەردەکەی فڕێداوە".

لەلایەکی دیکەوە: پزیشکێکی پسپۆڕ بە ئاڤای وت، دەکرێت ئاوەکە پاک بێت، بەڵام فڕێدانی بەردی گورچیلە هەروا ئاسان نییە مەرج نیە بەو ئاوە فڕێیان دابێ.

بەدواداچوونی ئاڤا: ڕزگار کۆچەر، پەیامنێری ئاڤا چووەتە گوندەکە، لەوکاتە تیمێکی وەزارەتی شارەوانیش لەوێ بوون، نموونەیەکی ئاوەکەیان بردووە لەگەڵ خۆیان بۆ تاقیگە بۆ پشکنین.

زانیاریی زیاتر: چەندین کۆمپانیا داوایان کردووە کە لەوێ کارگەی ئاو دابنێن، بەڵام ڕێگەیان پێنەدراوە، خەڵکی ناوچەکە وتوویانە ئەم ئاوە بۆ فرۆشتن نییە، تەنها بۆ خێرە و دوعای خێرمان بۆ بکەن.