دابەشکردنی زەوی دەستپێدەکاتەوە و سوودمەندبووان بەگوێرەی خاڵ وەریدەگرن

ئاڤا نیوز

 

پرۆسەی وردبینی لە فۆڕمی وەرگرتنی زەوی تەواو دەبێت و پرۆسەی دابەشکردن لە شارەوانییەکان دەستپێدەکاتەوە، ئەمەش بەچەند قۆناغێکە و سەرجەم ئەو فەرمانبەرانەی فۆرمەکەیان پەسەندکراوە زەوی وەردەگرن.

 

وێنە گەورەکە: زیاتر لە 430 هەزار فۆڕمی دابەشكردنی زەوی پەسەندکراون و گەڕێنراونەتەوە شارەوانییەکان، هاوکات نزیکەی 50 هەزار فۆرمی دیکە ماون کە لە پرۆسەی وردبینی و پێداچوونەوەدان.

 

لێدوانی فەرمی: سەربەست مەولوود، سەرپەرشتیاری تیمی وردبینیی پرۆسەی دابەشکردنی زەوی له‌ وه‌زاره‌تی شاره‌وانی بە ئاڤای گوت، "کۆتایی ئەم مانگە پرۆسەی وردبینی تەواو دەبێت، قۆناغی دواتر دابەشکردنی زەوییەکانە، ئەو زەوییانەی دابینکراون بەسەر ئەو کەسانە دابەش دەکرێن کە خاڵی زۆریان هەیە، هەر فۆڕمێکیش پەسەند کرابێت زەوی پێدەدرێت ئەگەر لە سنووری شارەوانی خۆیشی نەبێت، لە نزیکترین سنووری شارەوانی پێی دەدرێت."

 

ئەمەش بزانە: ئەم هەفتەیە 27 هەزار فۆرم لە وەزارەتی شارەوانییەوە ڕەوانەی ئەنجوومەنی وەزیران کراون بۆ پەسەندکردن، کە لە یەکەی 80، خانەنشین و فەرمانبەرن، لە ئێستاشدا کار لەسەر 13 هەزاری دیکە دەکرێت کە لە یەکەی 70 و خانەنشینن.