لە کاتی ڕاوەماسی لە هەڵەبجە تەقینەوەیەک ڕووی داوە و سێ کەس گیانیان لەدەست داوە

ئاڤا نیوز

 

بەرەبەیانیی ئەمڕۆ لە سنووری پارێزگای هەڵەبجە لە نزیک گوندی سازان، لە کاتی ڕاوەماسی تەقینەوەیەک ڕووی دا و بەوهۆیەوە سێ کەس گیانیان لەدەست دا و چوار کەسی دیکەش برینداربوون.

 

لێدوانی فەرمی: ڕائید ئاکام قوتبەدین، وتەبێژی بەڕێوەبەرایەتیی پۆلیسی پارێزگای هەڵەبجە بە ئاڤا میدیای ڕایگەیاند: "حەوت هاونیشتمانی لە کاتی ڕاوەماسی لە گوندی سازان ماددەی TNTـیان پێدا تەقیوەتەوە و بەپێی زانیارییە سەرەتاییەکان سێ کەس گیانیان لەدەست داوە و چوار کەسی دیکەش بەوهۆیەوە بریندار بوون."

 

گوتەبێژی پۆلیسی هەڵەبجە ئاماژەی بەوەشکرد، بەهۆی سەختی و هەڵدێریی شوێنی ڕووداوەکەوە، تیمە فریاگوزاری و ئەمنییەکان تا ئێستا نەیانتوانیوە بگەنە شوێنی سەرەکیی ڕووداوەکە.

 

سەبارەت بەو هاونیشتمانییانەی برینداربوون لەو ڕووداوە، ڕائید ئاکام وتی: "تەنها دوو لە بریندارەکان گەیێندراونەتە نەخۆشخانەی فریاکەوتنی هەڵەبجە و چارەسەری پێویستیان بۆ کراوە".