دڵنیایی دەدرێتە ئەو جووتیارانەی بەرهەمی گەنمیان لە بڕی وەرگیراوی سایلۆكان زیاترە

ئاڤا نیوز 

 

بەڕێوەبەری گشتیی كشتوكاڵی هەولێر لە ڕێگەی ئاڤا میدیاوە دڵنیایی دەداتە ئەو جووتیارانەی كە بەرهەمی دانەوێڵەیان زیاترە لەو بڕەی كە لە سایلۆكان وەردەگیرێت و دەڵێ لەڕێگەی ژمارەیەك كۆمپانیاوە بەرهەمەكانیان ساغ دەكەینەوە.

 

وێنە گەورەكە: بە هۆی ئەوەی وەزارەتی بازرگانیی عێراق بڕێكی كەم و دیاركراوی گەنمی جووتیارانی هەرێمی كوردستان وەردەگرێت، زۆرێك لە جووتیاران بڕێكی زۆر گەنمیان لەسەر دەمێنێتەوە، حكومەتی هەرێمی كوردستان لەڕێگەی جۆراوجۆرەوە هەوڵی ساغكردنەوەی بەرهەمەكانیان دەدات و ناهێڵێت زیانی داراییان بەركەوێت.

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر بە ئاڤا میدیای ڕاگەیاند: ئەمساڵ ئاستی بەرهەمهێنانی دانەوێڵە لە هەرێمی كوردستان وەك پێویست نەبوو ئەمەش بەهۆی كەمیی ڕێژەی دابارین، بۆ ئەمەش زیانی گەورە بە زەوییە دێمییەكان كەوتووە، بەشێك لە زەوییە دێمییەكان بەهۆی كەمیی بارانەوە ئەمساڵ بەرهەمیان نەبوو و جووتیارەكانیان ڕەنج و ماندووبوونیان بەفێڕۆ چوو.

 

- زەوییە بەراوەكان ئەمساڵ بەرهەمیان هەبووە و لە ئاستێكی مامناوەندە و بەرهەمەكانیان ئامادە كراوە بۆ پرۆسەی بەبازاڕكردن.

 

- هەرێمی كوردستان لە هەر دۆخێكدا بێت، ساڵانە بەرهەمی دانەوێڵەی زیاترە لە پێویستیی ناوخۆ، بۆیە پێویستە بەرهەمەكەی لە دەرەوە بەبازاڕ بكرێت، بەڵام بەداخەوە عێراق وەك پێویست بەرهەمی هەرێمی كوردستان وەرناگرێت و بابەتەكە بە سیاسی كراوە.

 

- كارئاسانی بۆ ئەو جووتیارانە دەكەین كە بەرهەمیان زیاترە لەوەی لە سایلۆكان وەردەگیرێت بۆ ئەوەی لە دەرەوەی هەرێمی كوردستان بەرهەمەی ساغ بكاتەوە، هەروەها لە ناوخۆش لەڕێگەی ژمارەیەك كۆمپانیای تایبەتمەندەوە هەوڵی ساغكردنەوەی بەرهەمیی دانەوێڵەی سەرجەم جووتیاران دەدەین و ناهێڵین زیانی داراییان بەركەوێت.