765 بەکار‌هێنەری ماددەی هۆشبەر شیاندنەوەیان بۆ کراوە

ئاڤا نیوز

 

لە ماوەی 12 مانگی ڕابردوو لە ڕێگەی ڕاهێنانی تایبەت و چارەسەری پزیشکی و دەروونی، شیاندنەوە بۆ 765 بەکارهێنەری ماددەی هۆشبەر کراوە.

 

چیرۆکی سەرەکی: لە هەرێمی کوردستان شەش بەرێوەبەرایەتیی چاکسازیی کۆمەڵایەتی هەن، لەهەر بەڕێوەبەرایەتییەک سەنتەری شیاندنەوەی ئالوودەبووانی ماددەی هۆشبەر کراوەتەوە و کار لەسەر شیاندنەوەی بەکارهێنەرانی ماددەی هۆشبەر دەکات پێش تەواوبوونی ماوەی حوکمیان.

 

لێدوانی فەرمی: پەیام فەتحوڵڵا، بەڕێوەبەری پلان و بەدواداچوون لە بەڕێوەبەرایەتیی گشتیی چاکسازیی کۆمەلایەتی بە ئاڤای گوت: لەڕێگەی پزیشکانی دەروونی، توێژەرانی کۆمەڵایەتی و توێژەرانی دەروونی لە سەنتەرەکانی شیاندنەوەی ئالوودەبووانی ماددەی هۆشبەر، 765 بەکارهێنەر و ئالوودەبووی ماددەی هۆشبەر ڕاهێنانی شیاندنەوەیان بۆ کراوە.

 

ژمارەکان وادەڵێن:

-لە هەرێمی کوردستان پێنج هەزار و 715 سزادراو لە چاکسازییەکان هەن.
-هەزار و 564 سزادراو بە ماددەی هۆشبەر حوکم دراون.
-911 سزادراو لەسەر بازرگانی بە ماددەی هۆشبەر حوکم دراون.
-653 سزادراو لەسەر بەکارهێنانی ماددەی هۆشبەر حوکم دراون.