بڕیارێکی عێراق داهاتی ناوخۆ لە هەرێمی کوردستان کەم دەکاتەوە

ئاڤا نیوز

 

بڕیارێکی دیکەی عێراق تایبەت بە هاوردەکردنی کاڵای بازرگانییەکان، دەبێتە هۆی کەمکردنەوەی داهات لە هەرێمی کوردستان.

 

چیرۆکی سەرەکی: جگە لە دەرکردنی ژمارەیەک ڕێنمایی نوێ لە پێناسی گومرگی و دروستکردنی کێشە لە هاوردەکردنی کاڵا لە دەروازە سنوورییەکانی هەرێمی کوردستان بۆ ناوەڕاست و باشووری عێراق، هاوکات بانکی ناوەندیی عێراق سەرجەم بانکەکانی ئاگادارکردۆتەوە، پابەند بن بە کۆدی نوێی هاوردەکردنی هەشت ژمارەیی لە سیستمی ئەسیکۆدا (ASYCUDA)، کە ڕاستەوخۆ لە دەستەی گشتیی گومرگی عێراق وەردەگیرێت، ئەم کۆدە تایبەتە بە وەرگرتنی سیولە لە سەکۆی ئەلیکترۆنی بانکی ناوەندی و ڕەوانە کردنی پارە بۆ هاوردەکردنی کاڵای بازرگانی.

 

لێدوانی فەرمی: ڕێباز حەملان، یاریدەدەری سەرۆکوەزیرانی هەرێمی کوردستان بە ئاڤای گوت: بەغدا بەم ئابڵوقە سیاسی و ئابووریەی لەگەڵ هەرێمی کوردستان دەیکات، کۆمەڵێک ڕینمایی دەرکردووە لە پێناسی گومرگی، فشاری لە دەروازە سنووریەکانی هەرێمی کوردستان کردووە، وایکردووە داهات کەمبۆتەوە، بازرگانانی ناچار کردووە بچن لە دەروازەکانی دیکەی عێراق کاڵا هاوردە بکەن و داهات نەیەتەوە هەرێمی کوردستان، بۆیە جگە لەو شاندانەی بۆ پرسی مووچە دەچنە بەغدا، شاندێکی دیکەمان بەسەرپەرشتی وەزیری ناوخۆ بەردەوام لە هەوڵی چارەسەرکردنی کێشەی دەروازە سنووریەکانە.

 

زانیاریی زیاتر: کامەران سەلاح باجگر، جێگری سەرۆکی ژووری بازرگانیی هەولێر بە ئاڤای گوت: ئەم کۆدە تایبەتە بە ڕەوانەکردنی پارە، پێشتر کۆدێکی سێ ژمارەی هەبوو لە هەرێمی کوردستان بەکارمان دەهێنا، ئێستا عێراق کردوویەتی بە کۆدێکی هەشت ژمارەیی و بازرگانانی ناچار کردووە بەشدار بن بۆ ئەوەی ناویان لە سەکۆی ئەلیکترۆنی تۆمار بکرێت، ئەمەش وادەکات داتای هەموو ئەو بارانەی هاوردەدەکرێن بچێتەوە بۆ حکومەتی عیراق، چونکە ئەو سیستمە ئێستا لە هەرێمی کوردستان نییە و ئەو کۆدە تەنیا لە دەستەی گشتیی گومرگەکانی عێراق وەردەگیرێت، هەر بازرگانێک ئەم کۆدەی نەبێت لە سەکۆی ئەلیکترۆنی دۆلاری پێنادرێت.

 

لەلایەکی دیکەوە: د. سەلاحەدین ئەحمەد، پسپۆڕی ئابووریی نێودەوڵەتی بە ئاڤای گوت: هەر بازرگانێک ئەو کۆدەی نەبێت سیولەی پێنادرێت و پارەی بۆ ڕەوانە ناکرێت بۆ دەرەوە بۆ کڕینی کاڵا، ئەمەش بازرگانان ناچار دەکات لە بەغدا ڕێکەوتن بکەن بۆ هاوردەکردنی کاڵاکانیان، ئەمەش کاریگەری لەسەر جموجۆڵی بازرگانی و دەستی کار لە هەرێمی کوردستان دەبێت.