سەرۆک ئەرکانی سوپای ئەمریکا نهێنییەک لەبارەی بنکەی ئەتۆمی فۆردۆ ئاشکرا دەکات

ئاڤا نیوز

سەرۆک ئەرکانی سوپای ئەمریکا دووپاتی دەکاتەوە هێرشەکەی ئەمریکا بۆ سەر ئێران سەرجەم ئامانجەکانی پێکاوە و چەندین ساڵ زانیاریمان لەسەر ئەو بنکەیە کۆکردووەتەوە.

وێنە گەورەکە: دوای هێرشە مووشەکییەکی ئەمریکا بۆ سەر بنکە ئەتۆمییەکانی ئێران، بەشێک لە میدیاکانی ئەمریکا ڕەخنەیان لە ئامانجی هێرشەکان گرت و پێیان وایە هێرشەکان بە تەواوی ئامانجەکانی نەپێکاوە و ئێران دەتوانێت لە ماوەیەکی کەم دەست بکاتەوە بە پیتاندنی یۆرانیۆم، ئەمەش ترەمپی توڕە کرد.

لێدوانی فەرمی: جۆن دانیاڵ کەین، سەرۆک ئەرکانی سوپای ئەمریکا لە کۆنگرەیەکی ڕۆژنامەوانیدا ڕایگەیاند: چەند ساڵێک پێش ئێستا زانیاریی ئەوەمان هەبوو کە جووڵەی نامۆ لە ئێران هەیە و فۆردۆ سەرەکیترین وێستگەی ئەتۆمی ئێران بوو، بۆ ماوەی 15 ساڵ لێکۆڵینەوەمان لەسەر کردووە.

لە کۆنگرە ڕۆژنامەوانییەکە سەرۆک ئەرکانی سوپای ئەمریکا ئەمانەشی وت:

٠ لێکۆڵینەوەمان لەسەر ورد و درشتی وێستگەی فۆردۆ کردبوو، تەنانەت شێوازی خەوتنی کارمەندەکانیشیان. هاوکات زانیارییمان لەسەر ڕووبەر و قووڵی وێستگەکەش هەبوو.

٠ ئەو چەکانەی بەکارمانهێناون، بەشێوازێک دروستکراون کە دەتوانن بەتەواوەتی ئامانجەکان بپێکن.

٠ ئێرانییەکان هەوڵیاندابوو بەشی سەرەوەی فۆردۆ بە چینێکی کۆنکرێتی داپۆشن.

٠ هەر شەش بۆمبەکە چوونە قووڵایی فۆردۆ و وێستگەکەیان تێکشاند.

٠ ئەو بۆمبانە بەشێوەیەک دیزاین کراون کە لە ناو وێستگەکاندا دەتەقنەوە.

٠ فڕۆکەوانەکان پێیان گوتین ئەمە گەورەترین تەقینەوە بوو کە بینیبێتمان.

٠ فڕۆکەوانەکان بەشێوەیەک ئامانجەکانیان پێکا، کە بووە شانازی بۆ گەلی ئەمریکا.

٠ ئێران ئاگادار دەکەینەوە بە کە وردی چاودێری هەنگاوەکانیان دەکەین.

باکگراوند: ڕۆژی یەکشەممە 22-6-2025،  ئەمریکا بە بەهێزترین فڕۆکەی جەنگیی وڵاتەکەی هێرشی کردە سەر پێگە ئەتۆمییەکانی ئێران و وەک خۆیان دەڵێن ئەم هێرشانە بوونەتە هۆی دوورخستنەوەی ئێران لە بوون بە خاوەنی چەکی ئەتۆمی.