نەتەنیاهۆ داوا دەکات دادگاییکردنەکەی دوابخرێت

ئاڤا نیوز

سەرۆكوەزیرانی ئیسرائیل داوا لە دادگەی وڵاتەكەی دەكات بۆ دوو هەفتەی تر وادەی دادگاییكردنەکەی دوابخرێت.

چیرۆکی سەرەکی: بڕیارە ڕۆژی دووشەممەی داهاتوو بە تۆمەتی گەندەڵی و وەرگرتنی بەرتیل، بنیامین نەتەنیاهۆ، سەرۆکوەزیرانی ئیسرائیل دادگایی بكرێت.

ڕاگەیێنراوی فەرمی: میدیای فەرمی ئیسرائیل بڵاویكردەوە، تیمی پارێزەرانی بنیامین نەتەنیاهۆ، بە فەرمی داوایەکیان پێشكەشی دادگەی ناوەندیی ئیسرائیل كردووە بۆ دواخستنی وادەی دادگاییكردنی ناوبراو كە بڕیارە ڕۆژی دووشەممەی داهاتووی بەڕێوەبچێت.

زانیاریی زیاتر: تیمەكە هۆکاری داواکەی نەتەنیاهۆ بۆ ئەوە دەگێڕنەوە، کە سەرۆكوەزیرانی ئیسرائیل سەرقاڵی ئیدارەدانی كاروباری وڵات و چارەسەركردنی كێشە سیاسی و نیشتمانییەكانە بەتایبەت شەڕی غەززە و هەوڵەكان بۆ رزگاركردنی بارمتەكان، بەڵام دادگەی ناوەندیی ئیسرائیل بەفەرمی وەڵامی داواكەی تیمی پارێزەرانی نەتەنیاهۆی نەداوەتەوە.

ئەمەش بزانە: ماوەی چەند مانگێكە، هەفتانە دوو جار سەرۆكوەزیرانی ئیسرائیل لە بەرامبەر ئەو تۆمەتانەی ئاراستەی كراون، ئامادەی دانیشتنەكانی دادگە دەبێت، بڕیاریشە لە ئەگەری سەلماندنی تۆمەتەكان، كە بریتیین لە گەندەڵی و وەرگرتنی بەرتیل و سەرپێچیكردنی متمانە، نەتەنیاهۆ سزای چەند ساڵێك زیندانی بەسەردا بسەپێندرێت.