فایلی خەڵک؛ دانیشتووانی گوندێکی بنەسڵاوە لە هەولێر گرفتی نەبوونی تۆڕی پەیوەندییان هەیە

ئاڤا نیوز

ژمارەیەکی زۆری دانیشتووانی گوندێک لە هەولێر، گرفتی نەبوونی تۆڕی مۆبایل و ئینتەرنێتیان هەیە. قایمقامی قەزاکەش دەڵێت، با ئاگادارمان بکەنەوە و کێشەکەیان بۆ چارەسەر دەکەین.

چیرۆکی سەرەکی: نزیکەی 700 ماڵی گوندی بنەسڵاوەی بچووک لە قەزای بنەسڵاوە لە هەولێر، کێشەی نەبوونی تۆڕەکانی مۆبایل و ئینتەرنێتیان هەیە و لەکاتی لەناکاو گرفتیان بۆ دروست دەبێت و ناتوانن پەیوەندی بە نزیکەکانیانەوە بکەن.

لێدوانی فەرمییەکان:

سامان ساڵح، موختاری گوندەکە بە ئاڤا میدیای ڕاگەیاند: بەهۆی نەبوونی تۆڕی پەیوەندی، بەردەوام خزم و کەس و کار گلەییمان لێ دەکەن و دەڵێن فڵان کەس مردوو بۆ نەهاتوون بۆ پرسەکەی، یان هاوڕێییەک، خزمێک نەخۆش دەکەوێت دەڵێن بۆ سەردانمان ناکەن، ئەوان نازانن کە چ کێشەیەکی گەورەمان هەیە.

حوسێن حەسەن، دانیشتوێکی دیکەی گوندەکەیە و دەڵێت؛ نەخۆشی دڵم هەیە جار جار کە دۆخی تەندروستیم تێکدەچێت بەهۆی نەبوونی تۆڕی پەیوەندی ناتوانم تەلەفۆن بۆ نزیکەکانم بکەم بەهانامەوە بێن.

بۆچوونی لایەنی بەرامبەر: جوان ڕەفیق، قایمقامی قەزای بنەسڵاوە بە ئاڤای وت،  با لەڕێگەی موختاری گوندەکە نووسراوێک بۆ قایمقامیەتی قەزای بنەسڵاوە بنووسن، کە تێیدا ئاماژە بەوە بکەن گرفتەکەیان چییە و چەند ماڵن، ئێمە کۆمپانیاکانی پەیوەندی ئاگادار دەکەینەوە بۆ ئەوەی بورجێکیان بۆ دابنرێت.