فایلی خەڵک؛ لە شەقڵاوە پارکێک بە ڕووی خانەنشینان دادەخرێت

ئاڤا نیوز

لە شەقڵاوە دەرگای پارکێک بە ڕووی خەڵک و خانەنشینان دادەخرێت، سەرۆکی شارەوانیش لەو بارەیەوە دەڵێت 'پارکەکە نۆژەن دەکرێتەوە'.

چیرۆکی سەرەکی: بە گوتەی ژمارەیەک خانەنشینی سنووری شەقڵاوە لە سەرووی مەیدانی شارەکەدا پارکێک هەیە، زیاتر لە 10 ساڵە خۆبەخشانە خزمەتی دەکەن، بەڵام چوار ڕۆژە دەرگای پارکەکەیان بەڕوودا داخراوە و دوو دووکانی تێدا دروستکراوە، داوای ڕوونکردنەوە دەکەن، ئایا پارکەکە فرۆشراوە یان بەکرێدراوە.

لێدوانی فەرمی: ڕێکان حوسێن، سەرۆکی شارەوانی شەقڵاوە، بە ئاڤای ڕایگەیاند: پارکەکە نەفرۆشراوە و بەکرێش نەدراوە، تەنیا دوو کۆشکی 20 مەتری لەنێو پارکەکەدا لە ڕێگەی زیادکردنی ئاشکراوە بەکرێ دراوە، ئێستاش پارکەکە نۆژەن دەکرێتەوە و گوڵ و داری تێدا دەڕوێنرێت، بۆیە دەرگاکانی داخراوە.

زانیاریی زیاتر: بە گوتەی سەرۆکی شارەوانی شەقڵاوە، پارکەکە وەکو پێشتر بە گشتی دەمێنێتەوە و دوای نۆژەنکردنەوەکەشی بەڕووی خەڵکدا دەکرێتەوە، تا درەنگانی شەو کراوە دەبێت.