کاردانەوەکانی دوای وەستانی جەنگی ئیسرائیل و ئێران بەردەوامن

ئاڤا نیوز

چەند ڕۆژێکە جەنگی نێوان ئیسرائیل و ئێران وەستاوە، بەڵام بەردەوام زانیاری نوێ ئاشکرا دەکرێ و تا ئێستا کاریگەری و لێکەوتەی زۆری هەیە و ئەم جەنگە بەردەوام چاوی میدیاکانی جیهانی لەسەرە.

وێنە گەورەکە: دوای 12 ڕۆژ لە جەنگی نێوان ئیسرائیل و ئێران، دواجار بە نێوەندگیری ئەمریکا، جەنگەکە ڕاوەستا و ئەمریکا و بەشێک لە وڵاتانی دیکەی ناوچەیی و نێودەوڵەتی لە هەوڵی ئەوە دان ئێران بگەڕێننەوە سەر مێزی گفتوگۆ بۆ دانوستان لەبورەی بەرنامە ئەتۆمییەکەی.

زانیاریی زیاتر: لە گۆڕەپانی فەلەستین لە تارانی پایتەختی ئێران تابلۆی "ڕۆژژمێری لەناوچوونی ئیسرائیل" هەڵواسرایەوە.

لە ماوەی جەنگی 12 ڕۆژەی ئێران و ئیسرائیل، بەرپرسانی ئیسرائیل گوتبوویان کە ڕۆژژمێرەکەی گۆڕەپانی فەلەستینیان لە هێرشێکدا لەناوبردووە. ئێران دەڵێت ئەوە تەنیا "هێرشێکی درۆنیی ناسەرکەوتوو" بووە و تابلۆی ڕۆژژمێرکە زیانی پێ نەگەیشتووە. لەگەڵ ئەوەشدا ئێستا تابلۆیەکی دیکە دانراوەتەوە.

ساڵی 2015 عەلی خامنەیی ڕێبەری باڵای ئێران ڕایگەیاند 25 ساڵی دیکە ئیسرائیل لەناو دەچێت و لەو کاتەوە ئێران ئەم ڕۆژانە دەژمێرێت و بەو پێیە ئێستا 5566 ڕۆژ ماوە بۆ لەناوچوونی ئیسرائیل.


ئەوەی ئێستا ڕوودەدات: وەستانی جەنگ کاردانەوە لێکەوتەی جیاوازی بە دوای خۆیدا هێنا، بەرپرسانی هەردوو وڵاتیش بەردەوامن لە لێدوانەکانیان، نوێترین زانیارییەکانی دوای وەستانی جەنگ ئەمانەن:

٠ وەزیری دەرەوەی ئەڵمانیا: ئەوروپا کاریگەریی هەیە لە دانوستانەکانی نێوان ئەمریکا و ئێراندا.

٠ عەباس عێراقچی، وەزیری دەرەوەی ئێران: ئێمە داوای ئاگربەستمان نەکرد، بەڵکو ئیسرائیل کردی.

٠ سوپای ئیسرائیل: 11 زانای دیاری ئێرانیمان کوشتووە کە پەیوەندییان بە بەرنامەی چەکی ئەتۆمییەوە هەبووە.

٠ سوپای ئیسرائیل: لە کاتی ئۆپەراسیۆنەکاندا لە ئێران، بۆردوومانی زیاتر لە 35 پێگەی بەرهەمهێنانی مووشەکمان کردووە.

٠ سوپای ئیسرائیل: نزیکەی 50%ـی یەدەگی سەکۆکانی مووشەکیمان لە ئێراندا تێکشکاندووە.

٠ میدیای ئێران: کەسێک لە پارێزگای جەیلان دەستگیرکرا کە زانیاریی لەسەر ناوەندەکانی پیشەسازیی بەرگری کۆدەکردەوە.