کەم ئاوی لەعێراق جووتیاران ناچار دەکات زەویەکانیان جێبهێڵن

ئاڤا نیوز

قەیرانی کەم ئاوی لە بەشێک لە پارێزگاکانی عێراق وایکردووە کشتوکاڵی بەروبوومی هاوینە و برنج بەتەواوی پاشەکشە بکات، بەشێکی زۆری جووتیارانی پارێزگای نەجەفیش دەستبەرداری زەوییە کشتوکاڵییەکانیان بوونە.

وێنە گەورەکە: پارێزگای نەجەف یەکێکە لەو پارێزگایانەی عێراق کە بەهۆی قەیرانی کەم ئاوی و وشکەساڵی و گۆڕانی کەشوهەوا زۆرترین زیان بەر زەوییە کشتوکاڵییەکانی کەوتووە، سەردەمانێک ئەو پارێزگایە بە کێڵگە بەپیتەکانی برنجی میشخاب ناسرابوو.

لێدوانی فەرمی: شاکر فایز، بەڕێوەبەری سەرچاوە ئاوییەکانی نەجەف ڕایگەیاند: بەهۆی کەمی ئاو ، لیژنەی نیشتمانی ئاو بڕیاری قەدەغەکردنی کشتوکاڵی هاوینە و چاندنی برنجی دەرکرد.

زانیاریی زیاتر: بەگوتەی فایز، لە مەودوا هەموو چالاکییەکی کشتوکاڵی سنووردار دەکرێت بە تایبەتی لەوەرزی هاویندا ڕێگری لە هەر چالاکییەکی کشتوکاڵی بێ مۆڵەت دەکرێت.

باکگراوند: پێشتر عەون دیاب، وەزیری سەرچاوە ئاوییەکانی عێراق ڕایگەیاند، 70%ـی داهاتی ئاوی عێراق لە تورکیا و ئـێرانەوە دێت، درووستکردنی بەنداویش لەو دوو وڵاتە کاریگەری نەرێنی لەسەر عێراق درووست دەکات.