ڕووسیا سیستمی بەرگری و پەرەپێدانی فڕۆکەی جەنگی بۆ هیندستان دەستەبەر دەکات

ئاڤا نیوز

لە هەنگاوێکی ستراتیژیدا کە جەخت لەسەر قووڵیی پەیوەندییە سەربازییەکانی نێوان هیندستان و ڕووسیا دەکاتەوە، مۆسکۆ بە فەرمی دووپاتیکردەوە کە پابەندە بە ڕادەستکردنی دوو سکوادرۆنی کۆتایی سیستمی بەرگریی ئاسمانیی پێشکەوتووی S-400 بە هیندستان لە ماوەی نێوان ساڵانی 2026 بۆ 2027.

وێنە گەورەکە: لەگەڵ ئەوەی گرێبەستی لەگەڵ ڕووسیا واژۆ کردووە، هیندستان هەوڵدەدات هاوسەنگییەک لە نێوان پەیوەندییە ستراتیژییەکانی لەگەڵ ئەو وڵاتە و هاوبەشییە نوێیەکانی لەگەڵ ئەمریکا و وڵاتانی ڕۆژئاوادا ڕابگرێت.

زانیاریی بەدەستهاتوو: بەپێی زانیاری میدیاکانی ڕووسیا، دواکەوتنی ڕادەستکردنی ئەم سیستمانە بە هیندستان بەهۆی جەنگی ئۆکرایناوە بووە، کە کاریگەریی لەسەر زنجیرەی بەرهەمهێنانی پیشەسازییە سەربازییەکانی ڕووسیا هەبووە.

زانیاریی زیاتر: هیندستان پێشتر سێ سکۆادرۆنی لەم سیستمە وەرگرتووە و لە ناوچە هەستیارەکانی نزیک سنوورەکانی پاکستان و چین جێگیری کردوون بۆ بەهێزکردنی توانای بەرگریی ئاسمانیی خۆی.

سەرچاوەکان ئاماژە بەوەش دەکەن کە گفتوگۆکان کراوەن بۆ ئەگەری واژۆکردنی گرێبەستی زیاتر لەسەر سیستمی S-400 لە داهاتوودا، کە نیشانەی متمانەی بەردەوامی هیندستانە بە تەکنەلۆژیای سەربازیی ڕووسیا، سەرەڕای فشارەکانی ڕۆژئاوا.

لەلایەکی دیکەوە: جگە لە گرێبەستی سیستمی بەرگریی S-400، گفتوگۆکانی نێوان هەردوو وڵات لایەنێکی دیکەی گرنگی هاوکاریی سەربازیشی لەخۆگرتووە، کە بریتییە لە پرۆژەی پەرەپێدان و نوێکردنەوەی فڕۆکە جەنگییەکانی جۆری Su-30MKI. ئەم پرۆژەیە نوێکردنەوەی ڕاداری فڕۆکەکان، سیستمی جەنگی ئەلیکترۆنی (EW systems)، و پڕچەککردنیان بە مووشەکی پێشکەوتوو دەگرێتەوە، ئەمەش توانای شەڕکردنی ئەم فڕۆکانە بە شێوەیەکی بەرچاو بەرز دەکاتەوە.