لە دهۆک کرێکارێک لە نهۆمی 23ـی باڵەخانەیەک کەوتە خوارەوە

ئاڤا نیوز

 

ئەگەرچی ئەمڕۆ هەینییە و پشووە، بەڵام کرێکارێکی خەڵکی باکووری کوردستان لە نهۆمی 23ـی باڵەخانەیەک لە دهۆک کەوتە خوارەوە و گیانی لەدەستدا.

 

وێنە گەورەکە: ساڵانە ژمارەیەکی بەرچاو کرێکار بەهۆی پابەند نەبوون بە مەرجەکانی سەلامەتی و نەبوونی هۆکاری سەلامەتی لە بەشێکی بەرچاوی پڕۆژەکان گیان لەدەست دەدەن. 

 

لێدوانی فەرمی: وەڵات ئۆزمان، سەرۆکی لقی دهۆکی سەندیکای کرێکاران بە ئاڤا میدیای وت، ئەگەرچی ئەمڕۆ هەینی پشووە و کرێکار نابێ کار بکات، بەڵام ئەم کرێکارە لەسەر کار بووە و هێشتا هۆکارەکەی نازانین. ڕووداوەکە کاتژمێر 10ـی بەیانی بووە، کرێکارەکە تەمەنی 43 ساڵ بووە و خەڵکی باکووری کوردستانە. کەسوکارەکەی هاتن و تەرمەکەیان بردەوە.

 

لەلایەکی دیکەوە: کیڤی بامەڕنی، سەرۆکی لقی دهۆکی سەندیکای بیناسازی بە ئاڤا میدیای وت، لێکۆڵینەوە لە ڕووداوەکە دەکەین، سەرەتای هەفتە لیژنەیەک لە شارەوانی و بەرێوەبەرایەتی بەرگری شارستانی و بەڕێوەبەرایەتی کار لەگەڵ سەندیکای بیناسازی پێکدێت بۆ لێکۆڵینەوە لە ڕووداوەکە. بە دڵنیایی لایەنی سەرپێچیکار دەدرێتە دادگا، چونکە ئەمڕۆ هەینییە و دەبێ بزانرێت چۆن ئەو کرێکارە لەسەر کار بووە.

 

ژمارەکان وادەڵێن: عوسمان زیندانی، سەرۆکی سەندیکای بیناسازی سلێمانی بە ئاڤای ڕاگەیاند: لە شەش مانگی سەرەتای ئەمساڵ، 17 کرێکار گیانیان لەدەستداوە، هاوکات بەگوێرەی ئاماری سەندیکای بیناسازی لقی دهۆک، لەو پارێزگایە ئەمساڵ 6 ڕووداوی گیان لەدەستدانی کرێکار تۆمار کراوە.