دوای جەنگی ئێران و ئیسرائیل پرسی گرووپە چەکدارەکانی عێراق سەرهەڵدەداتەوە

ئاڤا نیوز

 

دوای ڕاگرتنی جەنگی ئیسرائیل و ئێران، جارێکی دیکە دۆسییەی  گرووپە چەکدارەکانی نزیک لە ئێران و هێزەکانی حەشدی شەعبی سەرهەڵدەداتەوە و دەوترێت هەردوولا بیر لە چەکداماڵین یان تێکەڵبوون لەگەڵ هێزە ئەمنییەکان دەکەنەوە.

 

وێنە گەورەکە: دوای شەڕی داعش، عێراق تاڕادەیەک سەقامگیریی بەخۆیەوە بینی، بەڵام جموجوڵی گرووپە چەکدارەکانی بەناو بەرەی مقاوەمەی ئیسلامی لە عێراق، دۆخی ئەمنی خستووەتە قۆناغێکی هەستیارەوە و لە هەموو لایەکەوە هۆشداری دەدرێت بۆ ئەوەی ئەو گرووپانە لە چەک دابماڵرێن و چەک تەنیا لە دەستی دەوڵەت بێت.

 

لێدوانی فەرمی: فەلاح زەهەبی، شرۆڤەکاری سیاسی عێراقی ڕایگەیاند: گرووپە چەکدارەکانی عێراق دەستیان کردووە بە ئامادەکاری بۆ چوونە ناو پڕۆسەی سیاسی و یەکگرتن لەگەڵ هێزەکانی حەشدی شەعبی و پێشبینیش دەکرێت ئێران هەڵوێستی سەبارەت بەو هێزانە بگۆڕێت و داوای تێکەڵبوونیان لەگەڵ هێزە سەربازی و ئەمنییەکان بکات.

 

لەلایەکی دیکەوە: سەرچاوەیەکی ئاگادار لەبارەی چەکدانان و تێکەڵبوونی ئەو هێزە چەکدارانە دەڵێت، "پێشتر سەرکردەی گرووپە چەکدارەکان داوایان کردووە ببنە گرووپی سیاسی و پۆستی گرنگ و هەستیار لەناو حکومەتدا بەدەست بهێنن کە زۆربەیان پەیوەندییان بە دەزگا ئەمنییەکان و دژە تیرۆرەوە هەیە و بەڵام ڕەنگە لەمەودوا بەتایبەتی دوای ئەوەی ئێران هەژموونی لە ناوچەکە بەرەو کەمبووەوە پێدەچێت ئەم گرووپانە نەرمی بنوێنن.