هاتنی زیارەتكارانی ئێران بۆ عاشوورا لەڕێگەی دەروازە سنوورییەكانی كوردستانەوە دەستپێدەكات

ئاڤا نیوز

 

هاتنی زیارەتكارانی ئێران بۆ بەشداریكردن لە مەراسیمی عاشوورا و چلەی ئیمام حوسێن، لەڕێگەی دەروازە سنوورییەكانی هەرێمی كوردستانەوە لە ئێستاوە دەستیپێكردووە، پێشبینیش دەكرێت لە ڕۆژانی داهاتوو هاتنی سەردانیكاران زیاتر بێت.

 

وێنە گەورەکە: ساڵانە لە سەرەتای مانگی موحەرەم و ڕێوڕەسمەکانی عاشوورا، سەدان هەزار کەس لە شیعەمەزهەبەکانی عێراق و زیارەتكارانی بیانی سەردانی مەزارگەی ئیمام حوسێن لە کەربەلا دەکەن.

 

ڕاگەیێنراوی فەرمی: بەگوێرەی ئاژانسی هەواڵی مێهری ئێرانی، دەسەڵاتدارانی ئێران لەڕێگەی ئیدارەی مەرزەكانەوە هەماهەنگییان لەگەڵ دەسەڵاتدارانی هەردوو حكومەتی هەرێمی كوردستان و عێراق كردووە بۆ ئەوەی هاتووچۆی زیارەتكاران لە دەروازە سنوورییەكان ڕێكبخرێت و هیچ گرفتێكی ئەمنی و تەكنیكی دروست نەبێت.

 

زانیاریی زیاتر: بەگوێرەی ئامارەكانی ئەنجوومەنی پارێزگای كەربەلا، پارساڵ نزیكەی شەش ملیۆن زیارەتكاری ناوخۆیی و بیانی، بەشدارییان لە یادەكانی عاشوورا و چلەی ئیمام حوسێن كرد.

چی ڕوودەدات: دەزگا ئەمنییەكانی پارێزگاكانی نەجەف و كەربەلا كە مەزاری ئیمام عەلی و ئیمام حوسێنی لەخۆگرتووە، ئامادەكاریی پێویستییان كردووە بۆ پاراستنی ئەمنییەتی شوێنەكان، بۆ ئەم مەبەستەش پلانێكی ئەمنی تۆكمە داڕێژراوە لەگەڵ پێشكەشكردنی خزمەتگوزاریی تەندروستی و پێدانی خواردن و خواردنەوە بە زیارەتكاران بەخۆڕایی.

 

ئەوەی پێویستە بیزانیت: ڕۆژی عاشوورا دەکەوێتە دەیەمین ڕۆژی مانگی موحەڕەم، لەنێو موسڵماناندا پیرۆز و گرنگییەکی زۆری هەیە و شیعە مەزهەبەکانیش تێیدا ماتەم دەگێڕن بەوەی "ئیمام حوسێن لەو ڕۆژەدا شەهید کراوە".