ناوی مردووان دەسڕدرێتەوە و جۆر و كوالێتیی بەشە خۆراكی مانگانەی هاووڵاتیان گۆڕانی بەسەردا دێت

ئاڤا نیوز

 

لە چوارچێوەی پرۆسەی نوێكردنەوەی پسوولەی خۆراك، هەزاران ناو كە هی ئەو كەسانەن مردوون، یان لە دەرەوەی وڵاتن یاخود دوو پسوولەی خۆراكیان هەیە، بلۆك دەكرێن و ڕەش دەكرێنەوە و لەبەرامبەردا جۆر و كوالێتی بەشەخۆراكی هاووڵاتیان باشتر دەكرێت.

 

وێنە گەورەكە: لە هەرێمی كوردستان و عێراق، مانگانە بەشەخۆراكێكی دیاریكراو بە هەر خێزانێك دەدرێت، بەڵام هاووڵاتیان بەردەوام گلەییان سەبارەت بە جۆر و كوالێتیی بەشەخۆراك هەیە و وەزارەتی بازرگانیی عێراقیش لە هەوڵدایە ئەو گرفتە چارەسەر بكات.

 

لێدوانی فەرمی: سیامەند قادر نانەكەلی، بەڕێوەبەری ڕێكخستنی پسوولەی خۆراكی هەولێر بە ئاڤا میدیای ڕاگەیاند: بەردەوام جەختمان لە باشتركردنی جۆر و كوالێتی بەشەخۆراكی هاووڵاتیان كردووەتەوە لەگەڵ ئەوەشدا داوای زیادكردنی ڕێژەكەیشمان كردووە، لە كۆبوونەوەمان لەگەڵ وەزارەتی بازرگانیی عێراق ئەو داوایانەمان پێشكەش كرد و بەرپرسانی وەزارەتەكەش پێیان ڕاگەیاندین: یەكێك لە هۆكارەكانی پرۆسەی بەئەلیكترۆنیكردنی پسوولەی خۆراك ئەوەیە كە كوالێتی و جۆری بەشەخۆراك باشتر بكرێت.

 

- لەگەڵ ئەو نوێكردنەوەیەی پسوولەی خۆراك، ژمارەیەكی زۆر ناو لە پسوولەی خۆراك ناویان ڕەش دەكرێتەوە ئەو ناوانەش بریتین لە ناوی مردووان و ئەو كەسانەی كە لە دەرەوەی وڵاتن یاخود ئەو كەسانەی كە دوو پسوولەی خۆراكیان هەیە لەبەرامبەردا بڕی ئەو پارەیەی كە بۆ بەشەخۆراكی ئەو كەسانە تەرخان كراوە بەكاردەهێندرێت بۆ باشتركردنی كوالێتیی بەشەخۆراكی هاووڵاتیان.