پشكنین بۆ لیستی ناوی کاندیدی لایەنە سیاسییەكان دەكرێت

ئاڤا نیوز

 

نووسینگەكانی كۆمیسیۆن لە شارەكان، پشكنین بۆ ناوی کاندیدی لایەنە سیاسییەكان دەكەن بۆ هەڵبژاردنی پەرلەمانی عێراق و بەرپرسی یەكێك لە نووسینگەكانیش دەڵێت، ئەگەر هەیە گۆڕانكاری لە ژمارە و ناوی کاندیدەكان بكرێت.

 

وێنە گەورەكە: وا بڕیارە ڕۆژی 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت و لە ماوەی ڕابردوودا لایەنە سیاسییە بەشداربووەكان ناوی کاندیدەکانیان پێشكەش بە نووسینگەكانی كۆمیسیۆن كردووە و پاشنیوەڕۆی ڕۆژی پێنجشەممە 26-6-2025، دوا وادەی پێشكەشكردنی ناوی کاندیدەکان بوو و ئیدی دەرگای پێشكەشكردن داخرا.

 

لێدوانی فەرمی: خالید عەباس، بەرپرسی نووسینگەی دهۆكی كۆمسیۆنی باڵای سەربەخۆی هەڵبژاردنەكانی عێراق لە كۆنفڕانسێكی ڕۆژنامەوانیدا ڕایگەیاند: ئەگەر هەیە گۆڕانكاری لە لیستی ناوی کاندیدەکان بكرێت، چونكە پشكنین بۆ سەرجەم ناوەكان دەكرێت لەڕووی تەمەن و بڕوانامە و ڕێژەی ئافرەت، پاشان ناوەكان دەنێردرێن بۆ ئەنجوومەنی كۆمیسیاران، پاشان ناوەكان ئاراستەی وەزارەتی ناوخۆ و دەستەی دەستپاكی دەكرێن، بۆ ئەوەی وردبینی بكرێن.

 

- پێویستە سەرجەم لایەنە سیاسییەكان پابەند بن بە ڕێنماییەكانی كۆمیسیۆن و دوور بن لە پڕوپاگەندەی هەڵبژاردن.

 

زانیاریی زیاتر: هەریەك لە وەزارەتی ناوخۆ و دەستی دەستپاكی لە یەك بە یەكی ناوی کاندیدەکان دەكۆڵنەوە سەبارەت بە پێشینەی تاوان و بابەتی تێوەگلانی گەندەڵی.

 

ئەوەی پێویستە بیزانیت: لە سنووری پارێزگای دهۆك، 10 لایەنی سیاسی بەشدارییان لە هەڵبژاردنی پەرلەمانی عێراق كردووە، ئەوانیش بریتین لە:- پارتی دیموكراتی كوردستان، یەكگرتووی ئیسلامیی كوردستان، یەكێتیی نیشتمانیی كوردستان، بەرەی گەل، كۆمەڵی دادگەری، هەڵوێست، سۆسیالیست، نەوەی نوێ، ڕەوتی بابلیون، ڕەوتی نیشتمانیی ئاشووری.

 

ئەمەش بزانە: لە سنووری پارێزگای دهۆك 61 كەس کاندیدە، لەو ژمارەیە 40یان پیاو و 21یان ئافرەتن، بۆ كورسیی كۆتای پارێزگاكەش پێنج كەس کاندیدن، سێیان پیاو و دوویان ئافرەتن، دوو كەسیش بەسەربەخۆ خۆیان کاندید كردووە.