د.ئامانج مەحموود: هەرێمی کوردستان دەگەڕێتەوە سەر نەخشەی ئۆپێک

ئاڤا نیوز

 

چەند ڕۆژێکە شاندێکی تەکنیکی وەزارەتی دارایی و وەزارەتی نەوتی عێراق لە هەولێرن بۆ چارەسەرکردنی کێشەی مووچە و هەناردەکردنەوەی نەوت، د. ئامانج مەحموود دەڵێت: بە هەناردەکردنەوەی نەوت، هەرێمی کوردستان دەگەڕێتەوە سەر نەخشەی ئۆپێک، ئەو کۆمپانیایانەی کورستانیان جێهێشتبوو دەگەڕێنەوە و دەستی کار زیاد دەبێت.

 

وێنە گەورەکە: ماوەی دوو ساڵ و سێ مانگە، بەهۆی سکاڵایەکی وەزارەتی نەوتی عێراق، دادگای ناوبژیوانی پاریس هەناردەکردنی نەوتی هەرێمی کوردستانی بۆ بەندەری جەیهان ڕاگرتووە، وا بڕیارە ئەو شاندەی لە هەولێرن لەگەڵ هەرێمی کوردستان چارەسەری نوێ بۆ کێشەی نەوت و مووچە بدۆزنەوە.

 

لێدوانی فەرمی: د.ئامانج مەحمود، ئەندامی لیژنەی وزە لە پەرلەمانی عێراق بە ئاڤا میدیای ڕاگەیاند، ماوەی دوو ساڵە هەر شاندی هەرێمی کوردستان چووەتە بەغدا، بەڵام ئەمجارە شاندی بەغدا هاتوون دەیانەوێت بە شێوەی کۆتایی چارەسەر بۆ کێشەکان دابنرێت. ئەگەر هەناردەکردنەوەی نەوت دەستپێکاتەوە بیانوی بەغدا نامێنێت بۆ نەناردنی مووچە.

 

د.ئامانج مەحموود ئەمانەشی وت: زیانەکانی ڕاگرتنی نەوتی هەرێمی کوردستان، سەروو 25 ملیار دۆلارە.

- هەندێ لایەن دەیانەوێت بە هەموو شێوەیەک هێزی ئابووری هەرێمی کورستان لاواز بکەن، ئەوان گەیشتوونەتە ئەو باوەڕەی ئەم شەڕە بەوان ناکرێت.

- یەکێک لە بڕگە سەرەکییەکانی کۆبوونەوەکانی نێوان هەرێمی کوردستان و شاندەکەی بەغدا ئەو 16 دۆلارەیە کە مافی کۆمپانیاکانە.

- بەشێکی زۆری لایەنە شیعی و سونییەکان بۆچوونیان ئەوەیە کێشەی مووچەی فەرمانبەران چارەسەر بکرێت.
- زۆر گەشبینم کە کێشەی مووچەی فەرمانبەران کۆتایی دێت، هەموو ئاراستەکان ئاماژەی ئەوەن، چارەسەرێکی نزیک لە ڕێگایە، لە زووترین کاتدا ئەو کێشەیە چارەسەر دەکرێت.

- هەڵبژاردنی ئەمجارە وەک هیچ هەڵبژاردنێکی ڕابردوو نابێت بەهۆی ئەو شەڕەی لەناوچەکە ڕوویدا، زۆربەی لایەنەکانی بەغدا گەیشتوونەتە ئەو باوەڕەی چیتر حکومڕانی ئاوا ناکرێت.