تاقیکردنەوەی کۆتایی توانستی زمانی ئینگلیزی دەستی پێکرد

ئاڤا نیوز

 

دوای بەدواداچوونێکی ئاڤا، ئەمڕۆ تاقیکردنەوەی کۆتایی توانستی زمانی ئینگلیزی بۆ حەوت هەزار و 813 بەشداربوو لە خولی فێربوونی زمانی ئینگلیزی دەکرێت.

 

وێنە گەورەکە: تاقیکردنەوەی کۆتایی خولەکانى زمانى ئینگلیزی، هەڵسەنگاندنى بەشداربووانی ئاستە جیاجیاکانی خولی فێربوونی زمانی ئینگلیزییە لە سەنتەری زمانی زانکۆ حکومییەکانی هەرێمی کوردستان، بۆ مەبەستی بەدەستهێنانی مەرجی توانستی زمانی ئینگلیزی و وەرگرتنی نازناوی زانستی و خوێندنی باڵا /ماستەر و دکتۆرا لە زانکۆکانی هەرێمی کوردستان.

 

ڕاگەیێنراوی فەرمی: وەزارەتی خوێندنی باڵا و توێژینەوەی زانستی، بە هەماهەنگى لەگەڵ زانکۆ حکومییەکانى هەرێمى کوردستان  دەستپێکردنی تاقیکردنەوەی کۆتایی لە 14 سەنتەری زمانی ئینگلیزی لە زانکۆ حکومییەکان ڕاگەیاند.

 

ئەوەی پێویستە بیزانیت: 27/3/2025، ئاڤا داواکاریی هەڵگرانی بڕوانامەی ماستەر و  دکتۆرا، ئەو مامۆستا و موعیدانەی پێویستیان بە توانستی زمانی ئینگلیزی هەبوو، گەیاندە وەزارەتی خوێندنی باڵا و توێژینەوەی زانستی بۆ ئەوەی خولی زمانی ئینگلیزیان بۆ بکرێتەوە، ئەوەبوو لە 6/4/2025 ناونووسین بۆ تاقیکردنەوی توانستی زمانی ئینگلیزی لە سەنتەرەکانی زمان لە زانکۆ حکومییەکان دەستی پێکرد و لە 17/4/2025 تاقیکردنەوەی دیاریکردنی ئاستەکانیان بۆ کرا، دوای بەشداریکردنی خوازیارانیش لە ئاستە جیاجیاکانی فێربوونی زمانی ئینگلیزی، ئەمڕۆ تاقیکردنەوەی کۆتایی دەستیپێکرد.

 

زانیاریی زیاتر: تاقیکردنەوەی کۆتایی توانستی زمانی ئینگلیزی ئەمڕۆ دەستی پێکرد و تا 4/7/2025 بەردەوام دەبێت، حەوت هەزار و 813 خوازیار بەشداری دەکەن، بەمجۆرەی خوارەوە: 

690 بەشداربوو لە ئاستی  سەرەتا.
1950  بەشداربوو لە ئاستی بنەرەت.
3718 بەشداربوو لە ئاستی ناوەند.
1455 بەشداربوو لە ئاستی پێشکەوتوو.