پارێزگاری هەڵەبجە بەڵێنی چارەسەركردنی گرفتەكانی ناحیەی بەمۆ دەدات

ئاڤا نیوز

پارێزگاری هەڵەبجە بەڵێنی چارەسەركردنی گرفت و كەموكوڕیی هاووڵاتیانی ناحیەی بەمۆ دەدات كە خۆی دەبینێتەوە لە تەواوكردنی پرۆژەی ڕێگاوبان و هەڵگرتنەوەی مین و تەقەمەنی لە بەشێك لە گوندەكانی ئەو سنوورە و گرفت و بەربەستەكانی بەردەم جووڵەی بازرگانیی مەرزی پشتە.

چیرۆكی سەرەكی: ئەمڕۆ شەممە 28ـی حوزەیران، نوخشە ناسیح، پارێزگاری هەڵەبجە، بە یاوەری قایمقامی ناوەندیی هەڵەبجە و بەڕێوبەرانی پلاندانان و پڕۆژەکانی دیوانی پارێزگا، سەردانی ناحیەی بەمۆیان كرد و بەهاوبەشی لەگەڵ سەرۆكی شارەوانیی ناحیەكە، لەنزیكەوە بەدواداچوونیان بۆ گرفت و كەموكوڕی و داواكارییەكانی هاووڵاتیانی ناحیەكە كرد.

ڕاگەیێنراوی فەرمی: پارێزگاری هەڵەبجە، پاڵپشتی بۆ داوای هاووڵاتیان دووپاتكردەوە و بەڵێنی ئەنجامدانی چەند پڕۆژەیەکی گرنگی خزمەتگوزاری لە ناحیەكە پێدان.

لەلایەكی دیكەوە: لەمیانی سەردانەكەی، پارێزگاری هەڵەبجە سەردانی مەرزی پشتەی كرد بۆ لەنزیكەوە ئاگاداربوون لە گرفتەكانی مەرزەكە و چۆنیەتی بەڕێوەچوونی ئیشوكارەكانیان و جووڵەی بازرگانی لە مەرزەكە.

ئەوەی پێویستە بیزانیت: دوای سەردانی سەرۆكوەزیران مەسرور بارزانی، بۆ سنووری پارێزگای هەڵەبجە و بەلەبەرچاوگرتنی داواكارییەكانی هاووڵاتیانی پارێزگاكە كە خۆی لە نۆ داواكاری دەبینێتەوە، بڕیاردرا ڕێژەی 20%ـی داهاتی دەروازە سنوورییەكانی سنووری پارێزگای هەڵەبجە، بۆ پرۆژە خزمەتگوزارییەكانی پارێزگاكە تەرخان بكرێت و دەسەڵاتیش بدرێتە پارێزگار و بەرپرسانی ئیداریی شارەكە بۆ جێبەجێكردنی، لەو چوارچێوەیەشدا پرۆژەی گرنگی ڕێگەی بەمۆ-پشتە بە گووژمەی دوو ملیار دینار جێبەجێ دەكرێت.

زانیاریی زیاتر: هاوكات هەبوونی مینی چێنراو گوندنشینانی ژمارەیەك گوندی سەر بە ناحیەی بەمۆی هەراسان كردووە و بەهۆیەوە ژمارەیەك قوربانی لێكەوتووەتەوە، پێشتر ئاڤا لە بڕگەی فایلی خەڵك وەك یەكەمین دەزگای میدیایی، كێشەی ئەو گوندەی گەیاندە لایەنی پەیوەندیدار.