لە هەولێر سێ ئافره‌ت بە شێوەیەکی سەیر شۆفێرێک هەڵدەخەڵەتێنن و دزی لێ دەکەن

ئاڤا نیوز

لەسەر ڕێگەی هەولێر - کەرکووک سێ ئافرەت، شوفێرێک هەڵدەخەڵەتێنن و دزی لێ دەکەن، پۆلیسیش دەڵێت. با شۆفیرەکە بێت سکاڵا بکات و بەدواداچوونی بۆ دەکەین.

چی ڕوویدا: خەسرۆ ڕەشید، خەڵکی گوندی شەناغەی کەرکووکە، ئێوارەی رۆژی پێنج شەممە دەیەوێت بێت بۆ هەولێر تاوەکو کانتۆرێک بۆ بووکەکەی خۆی بکڕێت، بڕی 500 هەزار دیناری پێبووە. لە ڕێگا و نزیک هەولێر لای گوندی مورتکە، سێ ئافرەت داوای یارمەتی لێ دەکەن تا لەگەڵ خۆیان بیانگەیێنێت.

لێدوانی فەرمی: خەسرۆ ڕەشید بە ئاڤای ڕاگەیاند، دوو کچی گەنج بوون لەگەڵ دایکیان، دوو کچەکە سوار بوون دانەیەکی لە پێشەوە ئەوەی تر چووە دواوە، دایکەکەشیان لەدەرەوە بە تەلەفۆن قسەی دەکرد، دواتر دەستیان کرد بە قسە و منیان غافڵ کرد لە ناکاو دایکیان وتی وەرنە خوارەوە پێویست ناکات وا باوکتان دێت لەگەڵ ئەو دەرۆین، دواتر چەند مەترێک دوور کەوتمەوە سەیری گیرفانم کرد 500 هەزارەکە نەماوە، گەڕامەوە، بەڵام ئەوان ڕۆیشتبوون.


بۆچوونی لایەنی بەرامبەر: نەقیب کارزان ساڵح، وتەبێژی پۆلیسی هەولێر بە ئاڤای گوت، با ئەو شۆفێرە سەردانی بنکەی پۆلیس بکات و سکاڵا تۆمار بکات و ئێمەش دەست بە لێکۆڵینەوە دەکەین، وتیشی، ئەم جۆرە فێڵ و هەڵخەڵەتاندن و دزیە هەیە و دەبێت خەڵک وشیار بێت.