عێراق بۆ دابینکردنی سیستمی بەرگریی ئاسمانیی هانا بۆ کۆریای باشوور دەبات

ئاڤا نیوز

 

ئەندامێکی لیژنەی ئاسایش و بەرگریی لە پەرلەمانی عێراق دەڵێت: بۆ بەهێزکردنی سیستمی بەرگری وڵات، ئەمساڵ حکومەت ژمارەیەک گرێبەست  واژۆ دەکات، لەوانەش دابینکردنی سیستمی بەرگریی ئاسمانی لەگەڵ کۆریای باشوور.

 

وێنە گەورەکە: وەک شارەزایانی سەربازیی دەڵێن: عێراق پێویستی بە گۆڕینی ستراتیژیی سەربازیی هەیە و دابینکردنی سیستمی بەرگریی ئاسمانیی و فڕۆکەی جەنگی پێشکەوتووش وەک خاڵی لەپێشینەی ئەو ستراتیژە لەقەڵەم دەدەن.

 

لێدوانی فەرمی: یاسر وتوت، ئەندامی لیژنەی ئاسایش و بەرگری لە پەرلەمانی عێراق ڕایگەیاند، لەمساڵدا عێراق ژمارەیەک گرێبەستی سەربازیی لە بوارەکانی بەرگریی ئاسمانیی، هێزی ئاسمانیی و فڕۆکەی سەربازی واژۆ دەکات، بەمزووانەش لەسەر سیستمی بەرگریی ئاسمانیدا گرێبەست لەگەڵ کۆریای باشوور واژۆ دەکات.

 

لەلایەکی دیکەوە: جەمال تائی، شارەزای ئەمنیی دەڵێت، بۆ پاراستنی ژێرخان و دامەزراوە گرنگەکان و ئاسمانی عێراق، دابینکردنی سیستمی بەرگری ئاسمانیی پێویستییەکی ستراتیژییە، بۆیە گرنگە هاوشێوەی وڵاتانی کەنداو گرێبەستی نێودەوڵەتی درێژخایەن لەم بوارەدا واژۆ بکرێت، ئەگەر ئیرادەی سیاسیی و تەرخانی داراییش هەبێت، ئەمریکا لەم بوارەدا خاوەن کەرەستەی سەربازیی پێشکەوتووە و دەتوانێت بە عێراقیان بفرۆشێت.