دابەشکردنی زەوی بەسەر فەرمانبەران لە هەولێر دەستپێدەکاتەوە

ئاڤا نیوز

 

لە شاری هەولێر ئامادەکاری دەکرێت بۆ دابەشکردنی 23 هەزار پارچە زەوی بەسەر ئەو فەرمانبەرانەی كە ڕەزامەندیی ئەنجوومەنی وەزیرانیان بۆ وەرگیراوە.

 

چیرۆکی سەرەکی: نزیکەی ساڵێکە پڕۆسەی دابەشکردنی زەوی بەسەر فەرمانبەران دەستی پێکردووە، لە هەولێر سێ هەزار پارچە زەوی بەسەر فەرمانبەران دابەش کراوە، ئامادەکاریش دەکرێت بۆ ئەوەی پێش کۆتایی ئەمساڵ 23 هەزار پارچە زەوی دیکە بەسەر فەرمانبەراندا دابەش بکرێت.

 

لێدوانی فەرمی: کارزان عەبدولهادی، سەرۆکی شارەوانیی هەولێر بە ئاڤا میدیای گوت: بە هەماهەنگی لەگەڵ وەزارەتەکانی کشتوکاڵ، داد و دارایی کار لەسەر تەواوکردنی ڕێکارەکانی دابەشکردنی زەوی بەسەر فەرمانبەراندا دەکەین، بەڕێوەبەرایەتیی نەخشەدانانی ئاوەدانیش کار لەسەر دیزاینکردنی نەخشەی ئەو زەوییانە دەکات تا لەگەڵ ماستەرپلانی هەولێر بگونجێن.

 

زانیاری زیاتر: تا ئێستا لە هەولێر ڕەزامەندیی پێدانی زەوی بە 45 هەزار فەرمانبەری هەولێر دراوە تا زەوییان بەسەردا دابەش بکرێت.